Xanana, Lu-Olo, TMR Simu Posse ba Konsellu Estadu

Dili, www.news-viptv.com – Primeiru Ministru (PM), Kay Rala Xanana Gusmão hamutuk eis Prezidenti Republika nain rua (2) Francisco Guterres “Lu-Olo” ho Taur Matan Ruak, simu posse hosi Prezidenti Republika, Jose Ramos-Horta ba Konsellu Estadu nian ne’ebe halao Segunda (11/9/2023), iha Palasiu Prezidensial Ai-Tarak Laran, Dili.

Alende figura nasional nain 3 ne’e, membru Konsellu Estadu seluk maka Prezidenti Parlamentu Nasional, Maria Fernand Lay no membru nain lima nemadu hosi prezidenti republika hanesan Abilio da Conceição de Araujo, Maria Domingas Fernandes Alves “Mikato”, Tenente-Jeneral Tito da Costa Cristovão “Lere Anan Timur”, Madre Guilhermina Marçal no Milena Pires.

Entertantu membru nomeadu nain lima hosi prezidenti republika iha tan membru nomeadu nain lima seluk hosi Parlamentu Nasional maka Virgilio Smith “Cranek”, Jacinto Viegas, Vicente “Roke”, Numinando S. Martins “Buras”, Ricardo da Costa Ribeiro no Josefa Alves Pereira Soares.

Porta Voz Konsellu Estadu no Konselho Superior Defesa no Seguranca Joao Aparicio ba jornalista sira hateten, ba membru foun ba Konsellu Superiór Defeza no Seguransa (KSDS) hamutuk sanulu resin tolu (13) mak hanesan Primeiru-Ministru, Kay Rala Xanana Gusmão, Ministru Negosius Estranjeirus no Kooperasaun, Bendito dos Santos Freitas, Ministru Defeza, Contra-Almirante Donaciano do Rosário Gomes, Ministru Interiór, Francisco da Costa Guterres, Ministru Justisa, Amândio de Sá Benevides. Nain lima ne’e nu’udar membru governu atual.

Membru KSDS ne’ebe reprezenta Parlamentu Nasionál maka, Deputada Maria Terezinha da Silva Viegas, Deputadu David Mandati Dias Ximenes, Deputadu Duarte Nunes. Alende ne’e mos iha Xefi Estado Maior Generál das F-FDTL, Tenente-General Falur Rate Laek, Komandante Jerál PNTL, Komisáriu Jerál Henrique da Costa, Diretór Jerál Servisu Nasionál Intelijénsia, Longuinhos Monteiro, Júlio Tomás Pinto (Nomeadu husi Prezidente Repúblika), no Nuno Manuel Corvelo de Andrade Sarmento (Nomeadu husi Prezidente Repúblika).

Konsellu Estadu hanesan orgaun konsultivu Prezidente Repúblika nian ba asuntu polítiku, tuir Konstituisaun RDTL artigu 90 no 91. No Konsellu Superior Defeza no Seguransa hanesan orgaun konsultivu Prezidente Repúblika nian ba asuntu defeza, seguransa no soberania, tuir Konstituisaun RDTL artigu 148ᵒ.

Hafoin fó pose ba membru foun sira, Prezidente Repúblika kontinua kedas ho lidera reuniaun ba dahuluk hamutuk ho membru konsellu rua hodi ko’alia kona ba funsaun membru sira nian bazeia ba lei no rejimentu.

Membru Konsellu Estadu hamutuk sanulu resin haat no Konsellu Superior Defeza no Seguransa hamutuk sanulu resin tolu sei halao sira nia mandatu durante tinan lima.