Xanana Husu Povu Labele Husik Nasaun Monu ba Ditadura, Horta sei Lori Investor ba Oekusi

OEKUSI, www.news-viptv.com – Kandidatu Prezidenti Republika, Jose Ramos Horta hahu nia kampana volta daruak iha Ambeno, Oekussi hodi hato’o nia programa ba Prezidenti Republika.

Iha Oekusi, Ramos Horta foin lais ne’e okupa fatin dahuluk ho votos rihun sanulu resin sia atus hat tolu nolu resin tolu 19.433 hosi total votus validu hamutuk rihun tolu nolu resin hitu atus nen lima nolu resin ida 37.651.

Iha ninian komisiu politiku ne’ebe partisipa hosi rihun ba rihun povu Oekusi, Ramos Horta deklara sei lori investidor rai liur sira hodi haburas ekonomia iha Oekusi. Tamba ne’e, atu dezemvolvimentu no ekonomia iha Oekusi bele dezemvolve ho diak, persiza xefi estadu ho esperensia internasional no governu ne’ebe lidera hosi Xanana Gusmao ne’ebe konesidu internasionalmente.

Laos ne’e deit, maski governu hasai osan barak ona hodi sosa Ro Haksolok ne’ebe to’o ohin loron sedauk mosu, Ramos Horta promesa nia sei bele koalia ho nasaun balun hanesan uluk nia koalia ho alemanha ne’ebe fo roh Nakroma sem estadu hasai osan ruma.

Kona ba fronteira ne’ebe sedauk remata ho Indonesia tantu maritime no terreste, nia fiar katak ho futuru governasaun Xanana Gusmao sei resolve fronteira terreste Timor-leste nian, tamba xanana iha duni kapasidade resolve problema fronteira hanesan nai hatudu ona hasoru Australia ba fronteira maritima.

Prezidenti CNRT, Xanana Gusmao husu ba povu hotu, inklui iha Oekusi atu labele hili sala no fo dalan ba lider sira ne’ebe atu halo ditadura iha nasaun ne’e hodi ameasa povu sira nia direitu vota hodi vota tuir povu nia hakarak.

Iha komisiu politiku ne’e, Prezidenti Partidu Democratico, Mariano Assanami Sabino hamutuk ho lider partidu balun hanesan PUDD no PDRT, inklui Anacleto Bento Ferreira, kandidatu prezidenti republika iha volta dahuluk deklara sira nia pozisaun no husu ba nia apoiantes, militante no simpatizante partidu ida-idak nian atu vota ba Ramos Horta iha 19 Abril.

Reportagem: Gantry Meilana