Xanana: Estadu Laiha Razaun Adia Loron Eleisaun Parlamentar

DILI, www.news-viptv.com – Prezidenti Partidu Kongressu Nasional de Rekonstrusaun de Timor (CNRT), Kay Rala Xanana Gusmao hateten katak estadu laiha razaun atu adia fali eleisaun parlamentar.

Ba jornalista sira hafoin hasoru malu ho Presidenti Republika Jose Ramos-Horta relasiona ho asuntu realizasaun eleisaun parlamentar, Eis Prezidenti Republika no Primeiru Ministru ne´e mos esklarese, tuir siklus eleitoral, eleisaun parlamentar tenki akontese iha Maiu 2023.

Aprende hosi koligasaun pre eleitoral iha tinan 2018, Xanana Gusmao deklara nia partidu sei la halo tan koligasaun pre-eleitotal iha kualker eleisaun.

Xanana esplika esperensia moruk ne´ebe CNRT senti iha koligasaun, sai duni lisaun no rekonese katak CNRT halo duni erru ne´ebe sei la akontese tan iha futuru.

Iha 2018, Partidu CNRT halo koligasaun pre-eleitoral hamutuk ho Partidu Libertasaun Popular no Partidu Kmanek Haburas Unidade Nasional Timoroan (KHUNTO) no ikus CNRT hases an hosi governu ne´ebe CNRT lidera.

Antes ne´e iha dadersan, Xefi Estadu mos bolu ona Partidu Libertasaun Popular hodi rona mos partidu refere nian hanoin ba realizasaun eleisaun parlamentar. No iha orseik Partidu KHUNTO no PD mos hasoru malu ona ho xefi estadu ho asuntu hanesan.