Vota Kontra OJE 2024, FRETILIN Lakohi Lori Perigu ba Povu

DILI, www.news-viptv.com – Bankada FRETILIN iha nia deklarasaun politika hafoin votasaun final global proposta Orsamentu Jeral Estadu (OJE) 2024 deklara, vota kontra tamba lakohi lori partidu ne’e lakohi lori perigu ba povu Timor-Leste iha orsamentu refere.

Prezidenti Bankada FRETILIN, Aniceto Guterres esplika, Bankada FRETILIN nian pozisaun ba orsamentu hakarak alerta ba povu Timor-Leste katak OJE 2024 ne’e dezena finansia makina estadu ba tempu badak deit duke atu lori Timor-Leste hateke naruk.

“FRETILIN lakohi lori perigu ba Timor-Leste, tamba ne’e ami vota kontra. Tamba perigu tebes bainhira governu ida mai ho dezenu ekonomia ne’ebe bazeia ba nia mandatu ukun nian deit ka halo tuir idade moris ema ida nian deit, duke povu Timor-Leste nia futuru rasik,” dehan Aniceto, Kuarta (20/12/2023).

Haree ba folin sasan ne’ebe sa’e desde tinan kotuk no menus nutrisaun ho aihan diak ba Timor-Leste, aumenta infrenta hela klima ida ke laiha serteza ne’ebe hirak ne’e automatikamente sei fo impaktu ekonomia Timor-Leste nian liliu povu kiik sira.

Orsamentu ne’e, kontinua deputadu ne’e, la mai ho politika ekonomia ida ne’ebe bele ajuda produsaun nesesidade baziku rai laran no laiha programa ba hadia nutrisaun ba povu, laiha politika reziliensia ba situasaun atual hodi hasoru mudansa klimatika ne’ebe kada tinan fo ameasa ba Ita nia agrikultor sira liliu iha area rural.

“Vota kontra tamba iha diskusuan espesialidade, hanesan ohin ami nia sekjen hatoo ona katak Iha proposta alterasaun barak nebe desde inisiu FRETILIN aprezenta hodi hadia orsamentu estadu nee hodi responde nesesidade ema kiak sira, maibe infelismente maioria parlamentar no nono governu rasik lakohi simu alterasaun. Ami hakarak hadia orsamentu ida ne’e duni hodi sai orsamentu pro povu, tamba ami hatene katak orsamentu estadu maka mekanismu fiscal uniku ida ne’ebe durante ne’ee ita uza atu hadia kualidade moris ita nia ema sira,” nia dehan.

FRETILIN mos konsidera membru nono governu barak maka sedauk intende diak programa sira kona ba redusaun mal nutrisaun ba labarik, hamenus mortalidade oan, no bolsu da mae jerasaun foun wainhira sira dezena ba OJE 2024.

“FRETILIN vota kontra tamba, estrutura orsamentu rasik la halo dezgregasaun ba halo nia despeza ho reseita sira tuir padraun transparansia no akuntabilidade orsamental nian no ita lei enkuadramentu orsamental nian no finansas publiku nian. Tamba defisensia ida ne’e sei loke dalan luan liu ba uza sala fundus publiku nian ba interese grupu ka pessoal nian,” nia deklara.

Aniceto mos esklarese, razaun principal vota kontra tamba, hare orsamentu ne’e sei la fo influensia ba indikador ekonomia nian atu desemvolve ekonomia diak liu tan ba rai no povu Timor-Leste.

“Sei labele hamenus pobreza iha Timor-Leste, maibe kontinua kria impasse social, entre ema hirak nebe riku no riku ona, ho ema kiak sira liliu sira nebe hela iha area rural, agrikutor, inan isin rua sira, labarik sira hosi familia kiak no sira nebe rendementu uma la fiksu, la regular.

Ita nia ema ho edukasuan formal kiik, ema sira ne’ebe servisu iha setor informa no ema sira ne’ebe iha oan barak kiak liu, sidadaun sira ho idade 0-15, insidensia pobreza 49%

Sira mos hare’e sidadaun sira ho otas 0-15 nudar futuru nasaun nian, iha OJE ne’e FRETILIN hare laiha orsamentu ne’ebe fo benefisia ba sira.

“Prosesaun atu hamenus kiak 5%, durante ukun tinan lima, maibe iha kedan inisiu elimina ka halakon subsidiu fim do ano ba familia kiak no laiha rendimentu fixu, halakon uma naroman ba povu ba ema kbiit laek sira no programa social seluk ne’ebe fo benefisiu ba ema kiak sira,” nia dehan.

FRETILIN konsidera problema bo’ot ida ne’ebe preokupa estadu tomak maka sustentabilidade orsamental tamba hare’e ba kampu Bayu Undan ne’ebe durante ne’e sai fontes orsamental estadu, Timor-Leste laiha tan fontes rendementu bo’ot seluk hosi setor petrolifiu.

“Exeptu reseita domestik ne’ebe kontinua iha nivel menus 250 miloens menus kada tinan iha tinan 5 oin mai. Iha 2024, Timor-Leste nian fiscal 68 %, tamba setor ekonomia naun petrolifu sedauk bele kontribui diak mai ita nia orsamentu estadu kada tinan no ita depende deit ba fundu petrolifu atu taka defisensa hirak ne’e,” hateten Aniceto.

Ho gastu orsamentu hirak ne’e, FRETILIN prediksaun osan iha Fundu Minarai sei mohu iha tinan 10 oin maim aka iha 2034.

“Maski tuir FRETILIN nian analiza sei mosu lais liu antes 2030. Ita Bolu naran presifisu fiscal ne’ebe sei akontese wainhira ita laiha tan fontes finansiamentu foun seluk ho ita nia situasaun reseita domestika ne’ebe la liu hosi 250 miloens kada tinan, situasaun kuandu wainhira akontese presifisu fiscal estadu sei labele halo pagamentu ba funsionariu, subsidiu ba idozu sira nebe ita aumenta tan diak, subsiziu ba veteran no eis kombatentes sira, selu tusan dividas ne’ebe too ona liu biliaun 1,

OJE 2024 tuir FRETILIN la prefere prinsipiu diak sira atu ajuda Timor-Leste hodi hases an hosi persifisu orsamental ne’e.

“Orsamentu ne’e la aprezenta solusaun ba problema ida nee, nem hatudu indikador ba ida nee.Bankada FRETILIN vota kontra politika fiscal ne’ebe nono governu introdus iha OJE 2024 tamba hakarak rezolve menus osan ho dividas publiku ne’ebe ikus mai sei lori jerasaun foun sira moris ho tusan no halakon sira nian independensia ekonomia iha futuru,” hateten deputadu FRETILIN ne’e

PN liu husi sesaun plenária ohin aprova ona iha final global proposta OJE 2024, ho 41 votu a favor, 23 kontra no 0 abstensaun.

Proposta OJE ne’ebe aprovadu ho totál konsolidadu biliaun US$ 1,95 ba Administrasaun Sentrál, RAEOA no Seguransa Sosiál, sein Fundu Rezerva Seguransa Sosiál.

Valór ida-ne’e inklui dotasaun biliaun US$ 1,83 ba Administrasaun Sentrál no millaun US$ 60 uza ba RAEOA.

Husi montante totál despeza ne’ebé prevee ba Administrasaun Sentrál no RAEOA, millaun US$ 468,8 uza ba saláriu no vensimentu, millaun US$ 386,3 ba bens no servisu, millaun US$ 589,7 ba transferénsias públikas, millaun US$ 34,2 ba kapitál menór no millaun US$ 411 ba kapitál dezenvolvimentu.

Orsamentu Seguransa Sosiál, inklui Fundu Rezerva Seguransa Sosiál, iha montante millaun US$ 347,6. Presiza nota katak, OJE tinan 2024 prevee ho valór millaun US$ 788,2 ba asuntu ekonómiku, millaun US$ 467,1 ba protesaun sosiál, millaun US$ 140,9 ba edukasaun, millaun US$ 66,2 ba saúde no millaun US$ 45,2 ba abitasaun no infraestruturas koletivas.

Durante debate OJE iha espesialidade, aprova mós proposta alterasaun balun husi ministeriu sira maibé la afeta ba tetu ne’ebe mak iha.