Vizita Sultan Bolkiah ho Festival Kultura Rabilau, PR Horta Inkontru ho VPM Kalbuadi no Assanami

DILI, www.news-viptv.com – Prezidenti Republika, Jose Ramos-Horta iha Sexta lokoraik (12/4/2024) bolu vise primeiru ministru nain rua, Ministru Administrasaun Estatal, Ministru Transporte no Komunikasaun, ho Vise Ministru Komersiu no Industria.

Hafoin inkontru, Vise Primeiru Ministru no Ministru Koordenador assuntu Ekonomia no Ministru Turismu no Ambiente, Francisco Kalbuadi Lay esplika, prezensa sira nian inkontru ho xefi estadu maka oinsa governu sei konsolida hamutuk ekipa hodi servisu hamutuk ho Palasiu Prezidenti ba Festival Rabilau no Vizita hosi Sultan Hasannal Bolkiah, Xefi Estadu hosi Brunei Darrusalam ne’ebe sei mai iha Maiu.

Vise Primeiru Ministru no Ministru Koordenador Assuntu Sosial, Mariano Assanami Sabino esplika, Festival Kultura no Turismu sei realiza iha Rabilau-Munisipiu Ainaro, no Desportu ho Siensia no Teknolojia sei halo iha Dili no sei partisipa mos hosi premiadu nobel siensia no teknolojia nian.

Ba Parte Transporte no Komunikasaun no Komersiu ho Industria, membru governu nain rua ne’e atualiza informasaun kona ba interligasaun servisu entre ministeriu rua relasiona ho atividade exporta no importasaun.