Vitima Inundasaun Tilomar Simu Ona Apoia Emerjensia

  • Share
Vitima inundasaun iha Tilomar, Munisipiu Covalima ne'ebe simu ona apoia emerjensia hosi Autoridade Protesaun Sivil ho nia Parseria sira, Domingu (10/7/2022). Photo: Media APC

TILOMAR, www.news-viptv.com – Autoridade Proteção Civil (APC) liu hosi Diresaun Nasional Gestaun Risku Desastre (DNGRD) hamutuk ho parseria sira, setor privadu, organizasaun sira, inklui individual no seluk distribui ona sasan emerjensia aihan no laos aihan ba vitima inundasaun iha Postu Administrativu Tilomar, Munisipiu Covalima, Domingu (10/7/2022).

Apoia sasan emerjensia ne’ebe DNGRD- APC distribui ona ba vitima inundasaun iha Postu Administrativu Tilomar, Munisipiu Covalima. Photo: Media APC

Vitima sira hosi Tilomar ne’ebe simu ne’e mai hosi aldeia Wetaba, Suku Beiseuk ho total uma kain 26 no Aldeia Ai-Oan, Suku Lalawa ho total uma kain 37.

banner 336x280

“Sasan ne’ebe apoia bazeia lista hosi assesmentu rapidu ne’ebe ekipa konjuta foti,” esplika Diretor DNGRD, Agustinho Cosme Belo.

Ekipa protesaun sivil ne’ebe hola parte iha distribuisaun sasan emerjensia ne’e maka hosi DNGRD, Bombeiros, DNSPPP, no DNPCC. Entertantu parseira sira maka CVTL, PLAN International, Oxfam, World Vision no WFP.

Antes ne’e, iha Sexta (8/7/2002) Sekretariu Estadu Protesaun Sivil (SEPS), Joaquim Martins Gusmão ho Prezidenti Autoridade Protesaun Sivil (APC), Superintedente Polisia Ismael da Costa Babo informa ona situasaun desastre naturais iha parte kosta sul, inklui inundasaun ne’ebe akontese iha Munisipiu Covalima no Viqueque.

Iha desastre naturais ne’ebe akontese iha parte kosta sul ne’e rejista hamutuk familia 1,361 ne’ebe afetadu ba desastre naturais ne’ebe akontese iha parte kosta Sul Timor-Leste.

Alende lori sofrimentu ba familia refere, desastre naturais ne’e mos rezulta uma 218 populasaun nian hetan estragus.

“Atu informa det desastre naturais ne’ebe akontese iha kosta sul afeta ba Munisipiu 7, no tuir dadaus ikus 7 Jullu nian, hamutuk iha familia 1,361 maka afetadu ne’ebe mai hosi munisipiu Covalima, Viqueque, Manufahi, Ainaro, Baucau, Manatuto no Lautem,” informa Sekretariu Estadu Protesaun Sivil, Joaquim Gusmão ba jornalista sira, Sexta (8/8/2022), iha Palacio do Governo, Dili.

Hosi numeru refere, Covalima rejista familia ka uma kain 250 hetan desastre inundasaun ka be’e sa’e iha Postu Suai Villa, Maukatar no Tilomar.

Iha Viqeuque hamutuk uma kain 554 no afeta ba ema nain 1,656 ne’ebe akontese iha Viqueque Villa, Uato-Lari no Uato-Karbau.

“Manufahi 206, afetadu 1,014. Ainaro 3 maka afetadu, Baucau 11, Manatuto akontese iha Barique ho total familia 327 ho nia ema hamutuk 1,566. Lautem 2 maka afetadu. Anin bo’ot mos akontese sobu uma ida iha Lautem, Baucau, no Viqeuque. Rai halai taka uma ida iha Bobonaro, Manufahi 1, uma 2 iha Viqueque, 1 iha Lautem. Uma estragus 218, 3 iha Kovalima, 9 iha Manufahi, 3 iha Ainaro, 12 iha Baucau, 1 Lautem, 1 iha Bobonaro no 189 iha Viqeuqeu,” dehan Joaquim Gusmão.

Ho desastre naturais ne’e, Governu (Protesaun Sivil) hamutuk ho nia parseiru nasional no internasional responde kedan apoia emerjensia hanesan hahan no depois dadus iha ona sei fo apoia mos sasan konstrusaun uma nian ba vitima afetadu.

  • Share

Leave a Reply

Your email address will not be published. Required fields are marked *

error: Content is protected !!