UE Parseiru Forte ba Dezemvolvimentu Timor-Leste

DILI, www.news-viptv.com – Embaixador Uniaun Europeia (UE) ba Timor-Leste, Thorsten Bragrede hateten, UE nu’udar parseiru forte ba dezemvolvimentu Timor-Leste.

Embaixador Bragrede informa assuntu ne’e hafoin hasoru malu ho Primeiru Ministru, Xanana Gusmão, Segunda (29/9/2025) iha Palacio do Governo, Dili.

Bargfrede subliña katak, Uniaun Europeia fó apoiu bá Timor-Leste hosi tempu bá tempu, dezde independénsia fó apoiu bá dezenvolvimentu liu-liu iha agrofloresta, administrasaun públika, iha área saúde nian luta hamutuk ho Ministériu Saúde hodi halakon malnutrisaun tuir sistema Organizasaun Nasaun Unidas (ONU) nian.

“Tamba ne’e ami fiar katak Uniaun Europeia hanesan parseiru ida ne’ebe forte tebes ba Timor-Leste husi tempu ba tempu,” dehan Bargfrede.

Diplomata ne’e mós dikuste buat barak ho Primeiru-Ministru kona-bá valór sira direitus umanus nian, Lei internasionál no seluk tán.

Uniaun Europeia mós hein atu rona Timor-Leste nia lian atu defende direitus umanus iha ASEAN iha tempu badak.

Thorsten Bargfrede to’o iha Timor-Leste iha loron 1 fulan-setembru tinan 2025 ho ninia família iha Dili hodi troka embaixadór sesante Marc Friedrich ne’ebé asume kargu dezde Setembru 2022.

Kontribuisaun Uniaun Europeia nian bá prosesu dezenvolvimentu Timor-Leste nian boot tebes iha área oioin mak hanesan apoia adezaun Timor-Leste nian bá Organizasaun Mundiál Komérsiu (OMK), ASEAN no Akordu Parseria Ekonomika provizoriu EU-Pasífiku.

Alende ne’e, UE Apoia TL hodi hadi’a nutrisaun no seguransa ai-han no ajuda diversifika nasaun ne’e ninia ekonomia.

UE mós fó ona kontribuisaun substansiál bá desentralizasaun, reforma judisiál, jestaun finansas públikas no seluk tán.