TL Lansa Konsulta Públika Online Kona-Bá Polítika No Planu Asaun Bá Ekonomia Azúl

DILI, www.news-viptv.com  –  Governu Timor-Leste lansa ofisiálmente konsulta públika online ida kona-bá Ekonomia Azul, Polítika no Planu Asaun bá Promosaun Ekonomia Marítima ida ne’ebé Reziliente no Sustentavel iha Timor-Leste, 2025 to’o 2035.

Konsulta públika ne’e sei hala’o hosi loron 11 to’o 30 fulan-setembru tinan 2025 no nu’udár pasu importante ida iha avansu ajenda dezenvolvimentu sustentável no diversifikasaun ekonómika Timor-Leste nian.

Iha Komunikado Imprensa ne’ebe redasaun asesu, Polítika ne’ebé aprova “iha prinsípiu” hosi Konsellu Ministrus (KM), iha fulan-juñu tinan 2025, reflete vizaun brani Timor-Leste nian bá abordajen moderna ida, ne’ebé responsável bá ambiente no sentradu iha ema, ho objetivu bá dezenvolvimentu sustentável nasaun nian. Polítika no Planu Asaun nia intensaun atu sai roteiru ida bá kreximentu integradu no inkluzivu bá seitór kosteirus, mariñus no marítimus país nian.

Ezbosu bá konsulta ne’e tau tasi iha sentru estratéjia dezenvolvimentu nasionál país nian. Timor-Leste afirma papél tasi nian, nu’udár baze prinsipál bá identidade nasaun nian no fonte vitál bá valór ekonomiku, sosiál, kulturál no ambientál.

Iha Timor-Leste, Ekonomia Azúl define nu’udár polítika no asaun integrada lubuk ida ne’ebé promove dezenvolvimentu ekonómiku no sosiál liuhosi utilizasaun sustentável rekursus mariñus no kosteirus, bazeia bá prátikas ambientais ne’ebé metin. Abordajen ida-ne’e fó énfaze bá diversifikasaun, inkluzaun no ekilíbriu ekolojia bá tempu naruk.

Dokumentu ne’e estruturadu iha parte prinsipál tolu. Parte I inklui Introdusaun no Enkuadramentu Jerál; Parte II inklui Kuadru Estratéjiku Polítikas nian; no Parte III maka Planu Asaun ba implementasaun Ekonomia Azul iha Timor-Leste durante tinan sanulu oin mai, husi tinan 2025 to’o 2035.

Tuir kompromisu Governu IX Konstitusionál nian kona-ba transparénsia, inkluzaun no governasaun partisipativa, faze daruak ba konsulta nasionál sira ne’ebé envolve prezidentes autoridades munisipais, administradores postus administrativus no xefe suku sira sei hala’o iha fulan outubru tinan 2025, iha Dili, tuir fali ho enkontru prezensiál iha komunidades no sosializasaun polítika iha Timor-Leste laran tomak, iha tinan 2026. Faze ida-ne’e sei lidera husi Primeiru-Ministru Kay Rala Xanana Gusmão, ne’ebé lidera hela dezenvolvimentu Ekonomia Azul Timor-Leste nian.

Governu enkoraja parte interesada sira hotu, inklui sosiedade sivíl, organizasaun naun-governamentál sira, akademia, grupus komunitárius, setór privadu, parseirus dezenvolvimentu, nune’e mós indivídu sira ne’ebé iha interese, atu partisipa ativamente iha prosesu ida-ne’e, hodi fornese kontributus ne’ebé sei kontribui ba finalizasaun polítika no ninia implementasaun iha futuru. Partisipasaun ne’ebé luan ne’e importante tebetebes atu garante katak Polítika no Planu Asaun Ekonomia Azul Timor-Leste nian reflete aspirasaun, koñhesimentu, no nesesidade povu Timor-Leste nian.