DILI, www.news-viptv.com – Governu Portugal agradese tebes ba apoia finanseira rekuperasaun milliaun USD 10 ne’ebe Governu Timor-Leste fo ba povu Portugal relasiona ho insendiu ne’ebe akontese iha 14 Agostu 2024, iha Madeira.
Agradesementu Governu Portugal ne’e hato’o husi Embaixadora Portugal iha Timor-Leste, Manuela Bairos wainhira halo despedida ho Primeiru-Ministru (PM), Kay Rala Xanana Gusmão segunda (1/9/2025), iha Palácio do Governo, Dili.
“Ha’u mós hakarak hato’o ha’u-nia agradesimentu kle’an bá doasaun laran-luak nian ne’ebé foin lalais ne’e Governu Timor-Leste oferese hodi solidariza povu Portugés ne’ebé sofre bá dezastre naturál ka inséndiu,” dehan Manuela Bairos.
Iha sorumutu Konsellu Ministrus, Kuarta (27/8/2025), Konsellu Ministru manifesta nia solidariedade ho Repúblika Portugál no povu portugés, tanba inséndiu maka’as iha ai-laran ne’ebé foin lalais ne’e afeta rejiaun norte no sentrál nasaun nian, hodi estraga ai-laran liu ektare rihun 248 no halo ema mate.
“Iha kontestu ida-ne’e, aprova ona projetu Rezolusaun Governu nian, ne’ebé aprezenta hosi Primeiru-Ministru, Kay Rala Xanana Gusmão, ne’ebé autoriza fó doasaun ho dolar amerikanu millaun 10 ba Repúblika Portugeza hodi apoia rekuperasaun hosi estragu sira ne’ebé kauza hosi inséndius,” hakerek komunikadu imprensa ne’ebe publika husi Presidensia Konsellu Ministru.
Iha nia despedida, nia agradese bá kolaborasaun exelente ho Governu Timor-Leste no konsidera Kay Rala Xanana Gusmão hanesan líder ne’ebé sempre hatudu ninia apoiu no relasaun amizade ne’ebé metin tebes ho Nasaun Portugál.
Durante Manuela Bairos nia mandatu, iha momentu balun ne’ebé memorável tebes, hanesan Konferénsia Komunidade Luzu-Aziátiku, Jogu CPLP no seluk tán.
Durante tinan tolu ne’e mós Manuela Bairos la’o ona iha nasaun tomak, liu-hosi Projetu Pró-Portugés ne’ebé fó formasaun bá professór Timoroan sira bá pozisaun administrativu sira. Manuela Bairos sempre simu ho domin ne’ebé boot no nia rasik sei la haluha.
Timor-Leste iha fatin espesiál tebes iha Manuela Bairos nia moris pessoál no profisionál. Timor nia kauza sai desizivu bá Portugál ne’ebé hala’o papél diplomátiku krusiál iha luta bá autodeterminasaun ne’ebé kulmina iha independénsia.
