Taxa Xanana-Cosgrove ba datoluk, Relembra Hikas Prezensa INTERFET iha Timor-Leste

DILI, www.news-viptv.com – Misaun Forsa Internasional iha Timor-Leste, INTERFET ne’ebe mai iha Timor-Leste hodi stabilizia hikas paz no seguransa hafoin rezultadu referendum Timor-Leste iha Agostu 1999, liu hosi nia veteranu sira kontinua komemora loron importante ne’e hodi realiza jogu amizade ba datoluk ho F-FDTL ne’ebe hanaran Taxa Xanana-Cosgrove.

Iha jogu amizade ne’e ekipa F-FDTL manan ekipa INTERFET 4-0.

Hafoin jogu, antigu Prezidenti Republika Timor-Leste, Kay Rala Xanana Gusmao informa atividade ne’e importante los ba istoria Timor-Leste no atu relembra hikas prezensa INTERFET iha Timor-Leste hodi nune’e labele haluha hosi nova jerasaun sira.

“Hau sei husu nafatin ba INTERFET atu kontinua bebeik atividade ne’e iha futuru,” dehan Xanana Gusmao, Segunda (18/10/2021), iha Estadiu Municipal Dili.

Xanana esplika, nia mos sei husu ba INTERFET atu ajuda nasaun seluk, liliu iha kontinenti Afrika ne’ebe nasaun balun kontinua moris laiha paz no seguransa.

Antigu Komandante INTERFET, Jenerál Onorável Dom Peter Cosgrove AK AC (mil) CVI MC (Retd) liu hosi nia karta senti haksolok tebes bele fahe mensajen ida ba jogu amizade anuál ba Taxa Xanana Cosgrove ba datoluk nian.

Nia hakerek, Tinan rua-nulu resin liu ba, bainhira INTERFET tuun hala’o misaun iha Timor-Leste, membru INTERFET no povu Timoroan sira bele buka tempu hodi halimar jogu futeból. Momentu furak ida ba haksolok no amizade iha tempu ne’ebé susar liu.

“Tinan rua liu ba, iha aniversáriu misaun INTERFET ba rua-nulu, ha’u to’o rasik ba Dili hamutuk ho Xanana Gusmão hodi lansa jogu komemorativu ba dala-uluk entre nasaun INTERFET sira ho veteranu no soldadu Timoroan sira – ba Taxa Xanana Cosgrove,” dehan Peter Cosgrove.

Nia hakerek tan, “Momentu ne’e tempu lorokraik ida ne’ebé manas. Ain halai dalaruma agora la lais ona. Maibé amizade no respeita ba malu sai metin no forte liu tan. Durante ha’u nia viajen tinan rua liu ba ha’u mós sente, tanba ha’u hatene veteranu INTERFET barak tebes ne’ebé mak durante ne’e, haree no asiste progressu ne’ebé di’ak tebes iha Timor-Leste. Povu Timoroan ne’ebé reziliente no forte, ne’ebé ha’u haree ho momoos durante tempu INTERFET, apoia ba Timor-Leste nia dezenvolvimentu. “

Ba Peter Cosgrove, Timor-Leste nia konsidera sempre espesiál ba nia no ba Australianu barak. Austrália no Timor-Leste viziñu ba-malu liuhosi jeográfia. Parseiru liuhosi presiza no benefísiu ba malu. Maibé belun liuhosi istória no opsaun.

“Ita nia parseria agora ne’e forte los ona ho dalan serbisu hamutuk hodi responde ba COVID-19 no inundasaun durante tempu Páskua ne’ebé aat tebes iha Timor-Leste. Ha’u haksolok tebes ba ita nia hamutuk iha loron amizade ida ne’e,” nia dehan.

Nune’e mós furak tebtebes katak reprezentante INTERFET sira husi nasaun seluk mós sei uza farda jogu nian ohin loron hamutuk ho Australianu sira.

“Ha’u espera reprezentante husi Nova Zelanda, Estadus Unidus, Portugal no Brazil sei tulun INTERFET nia parte hodi hala’o jogu ho di’ak. Maibé kualkér ida ne’ebé mak manan, no ha’u fiar Timor mak sei manan, importante liu ha’u enkoraza ita hotu hodi haksolok amizade hamutuk ne’e, hanoin ba sakrifisiu barak ne’ebé halo ona hodi tulun ba Timor-Leste nia independénsia no dezenvolvimentu, no ita selebra ita nia futuru hamutuk.  ‘Viva Timor-Leste!’ no ha’u nia abrasu forte ba maluk sira hotu!”.