SEATOU Sei Tau Numeru Identidade ba Uma Komunidade

DILI, www.news-viptv.com – Hodi identifika komunidade sira nia hela fatin, Governu liu hosi Sekretaria Estadu assuntu Toponimia no Organizasaun Urbana (SEATOU) sei implementa tau numeru ba kada uma iha Kapital Dili nu’udar identidade ba uma komunidade nain.

Implementasaun ba identidade numeru uma ne’e, Sekretariu Estadu assuntu Toponimia no Organizasaun Urbana, Germano Dias informa wainhira sai fontes principal ba programa Meet the Press, Sexta (26/4/2024) ne’ebe realiza hosi Sekretaria Estadu Komunikasaun Sosial (SEKOMS) relasiona  ho eviksaun ne’ebe governu halo ba rai estadu ne’ebe okupa hosi komunidade sira.

Membru Governu ne’e apela nafatin ba komunidade sira ne’ebe hetan ona notifikasaun hodi hamamuk sira nia uma ne’ebe okupa rai estadu hodi kumpri no Governu sei la fo tempu ona wainhira ekipa tuun halo eviksaun.

Apela ne’e mos nia halo ba komunidade sira ne’ebe okupa area turismu hahu hosi Ulmera to’o Aipelu, Munisipiu Liquisa.

Governu mos husu ba komunidade sira ne’ebe hakiak animal atu labele husik animal livre hodi fo impaktu ba utilizador transporte hetan dezastre iha estrada publiku, inklui komunidade iha area Atabae ne’ebe governu notifika ona.

Iha meet the press ne’e, membru governu ne’e mos esplika katak involvimentu membru Forsa Armada F-FDTL laos atu terror no ameasa komunidade sira iha implementasaun eviksaun, maibe atu hasoru membru F-FDTL balun ne’ebe okupa mos espasu publiku ka rai estadu hodi kontra dezisaun governu nian.