SEATOU Aprezenta Objetivu atu Transforma Dili ba MOSS

DILI, www.news-viptv.com – Sekretáriu Estadu Asuntus Toponímia no Organizasaun Urbana (SEATOU), Germano Santa Brites Dias, iha reuniaun Konsellu Ministrus, Tersa (30/4/2024) halo aprezentasaun ida kona-ba medidas organizasaun urbana ne’ebé daudaun ne’e lao hela, ho objetivu atu transforma Dili sai ambiente ne’ebé Moos, Organizadu, Saudavel no Seguru (MOSS).

Iha Komunikadu Imprensa ne’ebe publika iha portal governu, Sekretáriu Estadu halo rezumu ida kona-ba kompeténsia no orientasaun ne’ebé simu no aprezenta dadus kona-ba despeju administrativu sira ne’ebé daudaun ne’e la’o hela iha área oin-oin sidade nian, ho objetivu atu hamenus risku inundasaun, poluisaun no dezorganizasaun urbana, nune’e mós posibilita hodi hala’o obra públika sira, hanesan loke-tan estrada urbana, konstrui jardín no reabilita Terminál Bekora.

“Presiza hatene mós katak, populasaun sira antes ne’e hetan ona notifikasaun no kompensasaun husi Governu anteriór ba despeju sira ne’ebé agora halo ona,” hakerek komunikadu imprensa ne’e.

Iha aprezentasaun ne’e ko’alia mós kona-ba konstrusaun semitériu públiku Metinaru no reabilitasaun Merkadu Manleuana no Taibesi, ne’ebé sei hadi’a kondisaun, hodi organiza no aumenta kapasidade merkadu boot rua sidade Dili nian, no mós fornese ambiente ida ne’ebé funsionál no saudavel liu ba sidadaun sira.

Alende ne’e, Konsellu Ministrus aprova projetu Rezolusaun Governu nian, ne’ebé aprezenta husi Ministru Defeza, Donaciano do Rosário Gomes no Ministru Interior, Francisco da Costa Guterres, kona-ba empeñamentu operasionál konjuntu entre Falintil-Forsas Defeza Timor-Leste (F-FDTL) no Polísia Nasionál Timor-Leste (PNTL), iha ámbitu vizita Sua Santidade Papa Francisco mai Timor-Leste.

Rezolusaun Governu nian ne’e autoriza empeñamentu operasionál hamutuk entre F-FDTL no PNTL, liuhusi operasaun patrullamentu ba  vijilánsia espesiál no kontrolu ba fatin hotu-hotu ne’ebé konsidera sensitivu iha sidade Dili, atu bele prevene no atua situasaun ba indivíduu sira ne’ebé bele kria instabilidade sosiál durante vizita Sua Santidade Papa Francisco.

Atu kumpre operasaun seguransa ne’ebé mosu iha Rezolusaun ne’e, sei kria Forsa- Tarefa Konjunta ida no sei estabelese diretiva konjunta ida, ne’ebé sei prevee planu ba estrutura apoiu lojístika seguransa nian, ba estrutura komandu no komunikasaun, ba regras empeñamentu husi forsa-konjunta, ba apoiu servisu intelijénsia no ba apoiu emerjénsia/medidas preventiva sira. Bele mós partisipa iha Forsa-Tarefa ne’e reprezentante Kaza Militár Prezidénsia Repúblika, Ministériu Negósius Estranjeirus no Kooperasaun, Ministériu Saúde, Servisu Migrasaun, Autoridade Protesaun Sivíl, ANATL, Sekretariadu Komisaun Organizadora no organizmu sira seluk ne’ebé identifika relevante hodi integra iha Forsa-Tarefa Konjunta ne’e.