HANOI, www.news-viptv.com – Timor-Leste iha jogu dahuluk SEA Games 2022 Vietnam, tenki rekonese vitoria Filipina 4-0 iha jogu Grupu A nian, Sexta (6/5/2022), iha Viet Tri Stadium, Phu Tho, Vietnam.
Golu vitoria Filipina nian loke hosi Christian Mangaron liu hosi golu kabesa ne’ebe nia halo iha minutu 11. No golu 3 seluk hatama hosi Denis Salazar minutu 56, Jovin Hervas 78’ no Oscari Orevillo.
Timor-Leste ne’ebe treina hosi treinador Brazileiru, Fabio da Silva iha jogu ne’e hetan deit oportunidade liu hosi Cristovao iha parte dahuluk nian, maibe bola assist ne’ebe husik hosi Elias Mesquita labele konserva sai golu.
Nune’e Mouzinho de Lima iha minitu 50 hetan oportunidade osan mean, hafoin halo penetrasaun tama ba area defeza, maibe bola ne’ebe nia husik hetan blokea diak hosi jogador defeza adversariu.
Nune’e mos Filipina, iha minutu lolos bele aumenta tan golu, maibe bola ne’ebe Bedic hetan hela det face to face ses dook hosi baliza Timor-Leste.
Timor-Leste iha jogu SEA Games Vietnam hamutuk ho uma nain Vietnam, Indonesia, Filipina no Myanmar iha Grupu A. Entertantu, iha Grupu B Thailandia hamutuk ho Malaysia, Kambodia, Singapore ho Laos.