PR Ramos-Horta Kritika Lider Mundial ba Falta iha Prevensaun Konflitu

DILI, www.news-viptv.com – Funu no konflitu ne’ebe mosu iha nasaun-nasaun hamosu Kritika husi Prezidente Repúblika (PR) no Premeadu Nobel da Paz, José Ramos-Horta ne’ebe konsidera falta husi lider mundial sira ba prevensaun konflitu. 

Kritika ne’e PR Ramos-Horta hato’o wainhira hato’o palestra Kona-ba Dezafiu Pàs iha Mundu Kontemporaneu iha Institutu Internasionál no Estratéjiku Estudu Bangladesh nian (BIISS) iha Dhaka, Tersa (17/12/2024).

Iha prevensaun konflitu nian no mos konflitu globál oioin, inklui funu Ukránia-Rúsia, krize sira iha Síria no Israel-Palestina, no situasaun iha Myanmar, lolos Konsellu Seguransa Nasoins Unidas makai ha papel importante hodi hare assuntu ne’e.

“Xefe Estadu mos aborda krize Rohingya nian, nia subliña nesesidade mos atu rezolve kestaun ida-ne’e hodi garante estabilidade rejionál,” hakerek komunikadu imprenssa ne’ebe redasaun simu husi Servisu Komunikasaun Sosial Presidensia Republika.

Prezidente destaka mós signifikadu hosi kooperasaun rejionál, hodi espresa otimizmu kona-ba adezaun antesipadu Timor-Leste nian ba iha Asosiasaun Nasaun Sudeste Aziátiku nian (ASEAN) iha tinan oin.

Prezidente Ramos-Horta elojia mos Xefe Konselleiru Governo Bangladeze nian (PM Interinu) Profesór Muhammad Yunus ba ninia esforsu globál hodi hamenus kiak liu hosi inisiativa mikrokréditu. Xefe Estadu lembra wanhira nia konvida Profesór Yunus mai Timor-Leste iha 2004 hodi introdús mikrokréditu no marka inísiu ba programa sira iha Timor-Leste.

Reflete kona-ba Timor-Leste nia progresu dezde hahu independénsia iha 2002, Prezidente Horta mos nota ho Timor-Leste nia avansu signifikativu sira, inklui habelar kobertura eletrisidade besik 97% hosi total populasaun Timor nian no hasa’e esperansa moris hosi idade-60 mai kraik ba to’o idade-70 liu.

Durante nia vizita, iha agenda loro-kraik nian Prezidente Ramos-Horta mos halo audensia seminar ho estudante sira no lider juventude sira hodi subliña importánsia lideransa nian entre juventude sira hodi hasoru dezafiu doméstiku no internasionál atuál sira.

Programa ne’e hahu, loke ho Kántiku Timor nian “Oh… Timor” ne’ebé hananu husi Ego Lemos nu’udar Enviadu Espesiál no embaxadór Boa Vontade ba Meiu Ambiente no Rekursu Be’e.

Hafoin ne’e Prezidente Horta halo mos audensia ho Estudante Timor-oan sira hamutuk nain-10, ne’ebé dadaun ne’e hala’o estudu universitáriu iha Bangladesh. Estudante sira kontente bele hasoru malu direta ho Prezidente Repúblika hanesan mos Líder Mundial, hodi fahe sira nia esperiensia no prekupasaun.

Xefe Estadu no Laureadu Nobel ba Pás J. Ramos-Horta vizita ba Bangladexe subliña kompromisu atu hametin relasaun bilaterál sira no esforsu kolaborativu hodi rezolve dezafiu globál sira.