banner 1000x250

PR Ramos-Horta Hasoru Malu ho Timoroan sira iha Portugal

  • Share
PR Ramos-Horta wainhira hasoru malu ho Timoroan sira iha Lisboa, Portugal. Foto: Media PR
banner 728x90

LISBOA, www.news-viptv.com – Prezidente Repúblika, José Ramos-Horta iha nia vizita estadu alende hasoru malu ho entidade estadu sira iha Portugal, hasoru malu mos ho Timoroan sira ne´ebe dadauk ne´e iha Portugal.

Iha hasoru malu ho Timoroan sira ne´e, xefi estadu hetan akompanamentu hosi  Ministra Negósiu Estranjeiru no Kooperasaun, Adaljiza Albertina Xavier Reis Magno no Embaixadora Timor-Leste ba Portugál, Isabel Guterres.

banner 336x280
PR Ramos-Horta simu ho dansa tradisional hosi Timoroan sira iha Lisboa, Portugal. Foto: Mídia PR

“Enkontru ho komunidade Timoroan sira iha Portugál hodi atualiza situasaun polítika no ekonomia iha Timor-Leste,” hakerek komunikadu imprensa ne´ebe redasaun simu, Kuarta (2/11/2022) hosi Gabinete Media PR.

Hola prezensa iha enkontru ne´e maka Timoroan sira ne´ebe residensia iha Portugal, estudante no traballador sira ne´ebe dadauk ne´e servisu iha Portugal.

“Prezidente Repúblika agradese mós  Timoroan sira  ne’ebé hala’o estudu iha Portugál atu kontinua fo tempu hodi estuda ho didi’ak no destaka kona-ba susesu estudante nian ida husi Eskola Portugeza Ruy Cinatti, ne’ebé manan kompetisaun mundiál iha matemátika,” hakerek komunikadu ne´e.

Iha hasoru enkontru ne´e, Xefi Estadu aprezenta balansu kona-ba prosesu harii estadu durante tinan 20 nia laran, no problema oin-oin iha setór ekonomia, edukasaun no problema sosiál ne’ebe presiza  rezolve ho didi’ak.

PR Ramos-Horta foto hamutuk ho Timoroan sira iha Lisboa, Portugal. Foto: Mídia PR

Iha enkontru ne’ebé hala’o iha Embaixada Timor-Leste iha Lisboa, Xefi Estadu esplika mós bá Timoroan sira kona-ba vizita ba Portugál, hodi hametin liután lasu kooperasaun bilaterál ho Estadu Portugál, inklui hametin relasaun ho país sira seluk iha kontinente Europeia, Áfrika no Ázia.

“Adezaun Timor-Leste ba ASEAN nu’udar pasu importante ba polítika Timor-Leste, hodi hametin kooperasaun politíka, ekonomia ho nasaun sira hotu, inklui Europeia, Afrika no nasaun seluk tan,” Prezidente Repúblika dehan durante enkontru.

Antes ne’e, Xefe Estadu hala’o vizita ba Kamboja hodi husu mós apoiu polítika ba adezaun Timor-Leste nian ba ASEAN iha tempu besik.

Tuir Xefe Estadu, durante  tinan lima sei  hametin liután kooperasaun Timor-Leste ho nasaun sira hotu, hodi hadi’a hikas imajen polítika no ekonomia Timor-Leste ba mundu atu manan konfiansa no haforsa prosesu dezenvolvimentu Timor-Leste nian.

Premiadu Nobel da Paz, José Ramos-Horta husu atu Timoroan sira kontinua fó apoiu ba polítika Governu Timor-Leste iha aspetu hotu- hotu.

Iha fatin hanesan, Embaixadora Timor-Leste ba Portugal, Isabel Guterres mós agradese primeiru vizita Xefe Estadu nian, tanba fó tempu hala’o enkontru ho komunidade Timoroan sira iha Portugál.

Daudaun ne’e, Embaixada Timor-Leste kontinua koopera ho Timoroan sira, liu-liu buka rezolve problema sira ne’ebé kuaze ema na’in 5.000 liu hasoru iha Portugál.

Enkontru Xefi Estadu nian ne’e hetan partisipasaun másimu hosi Timoroan sira ne’ebé hela no hala’o estudu no servisu hodi reprezenta Timor-Leste iha Portugal.

Reprezentante Komunidade Timoroan, Manuel Abrantes ne’ebe hela iha Portugál sente orgullu, tanba vizita Xefi Estadu nian ne’e fahe mós hanoin ba sira kona-ba situasaun iha Timor-Leste no ajuda mós Timoroan sira iha Portugál hodi kontribui ativamente ba dezenvolvimentu nasionál.

Manuel Abrantes mós preokupa ho Timor-Leste nia problema ekonomia no falta rekursu umanu, hodi implika adezaun Timor Leste ba ASEAN.

Iha parte seluk, Timoroan no Ex Prezidente Tribunal Rekursu, Dr. Claudio Ximenes husu ba estadu Timor-Leste atu halo revizaun ba lei sira iha Timor-Leste, liu-liu lei kombate korrupsaun hodi haforsa papel estadu, hodi luta kontra korrupsaun iha Timor-Leste.

  • Share

Leave a Reply

Your email address will not be published. Required fields are marked *

error: Content is protected !!