Postu Saude Falta Be’e Mos, PN Husu Governu Tau Atensaun

DILI, www.news-viptv.com – Parlamentu Nasional (PN) husu ba governu atu tau atensaun ba problema falta be’e mos iha Postu Saude sira tamba bele fo impaktu ba atendementu servisu ba pasiente sira.

Husi dadus observasaun ne’ebe halao husi sosiedade sivil, Prezidenti Komisaun F PN, Maria Gorumali Barreto, hateten fiskalizasaun ne’ebe PN halo hare duni katak maioria Postu Saude infrenta falta be’e mos.

“Iha kestaun balu mak ita hare’e liu-liu ba be’e mos, hanesan rezultadu fiskalizasaun ne’ebe mak ami iha katak iha postu saude balu mak iha be’e mos, maioria iha postu saude barak mak falta be mos, problema laos Ministeiru Saude mak toma responsabilidade ba be’e mos, maibe be’e mos ne’e fila fali ba Ministeiru Infraestutura liu-liu ba iha be’e Timor Leste, ida ne’e atu bainhira atu halo kanalizasaun be’e mos iha komunidade, presisa tau mos preoridade ba iha fatin publiku sira, postu saude atu nune’e pasiente sira bele asesu ba,” dehan Maria Barreto ba jornalista sira Kinta (6/6/2024), iha Uma Fukun PN, Dili.

Alende ne’e, PN mos husu ba Ministeriu Saude hodi kontinua hare’e fasilidade sira, inklui atendementu ba pasiente, liliu funsionamentu servisu husi professional saude sir aba iha oras servisu.

“Husi Komisaun F, ami apresia ba sira nia servisu ida ne’e, dados ne’ebe mak sira iha, sai hanesan referensia ba Komisaun F no mos governo, oinsa mak bele konsidera buat balu ne’ebe mak ita presisa tau konsiderasaun no mos presisa tau preoridade iha orsamentu jeral do Estadu 2025 nian,” informa membru deputada ne’e.

Iha observsaun sosiedade sivil informa katak, maioria fasilidade saude iha postu saude sira la seguru ba pasiente sira atu halo tratamentu ho diak.

Diretor Exekutivu FONGTIL, Valentim da Costa Pinto esplika, iha reuniaun ne’ebe nia parte halo ho Komisaun F PN relata sira nia observasaun iha postu saude munisipiu, inklui RAEOA haree konaba komportamentu profisionais servisu saude nian no jestaun mediku, konaba ai moruk no sasan sira no atendimentu sira, no mos atendementu ba pasiente sira ne’ebe pasiente tenki hein oras ida no oras rua.

“Situasaun saude iha Timor Leste, ita presisa tau atensaun,” hateten Valentim.