Posse ba Kargu Diresaun no Xefia MJDAK, Nelyo Isaac Husu FP Hatudu Profesional Servisu

Dili, www.news-viptv.com – Ministru Juventude, Desportu, Arte no Kultura, Nelyo Isaac Sarmento husu ba Funsionariu PUblikus (FP) iha MJDAK atu hatudu nafatin professional servisu.

Nelyo Isaac deklara lia fuan ne’e iha deskursu ba posse kargu diresaun no xefia sira hamutuk 60 ne’ebe kompostu hosi mane nain 39 no feto 21.

Iha tomada de pose ida ne’e Funsionariu Sira ne’ebe  Grau Kik Iha mos oportunidade atu asumi Kargu Xefia, bazeia ba dekretu Lei 5/2016 no dekretu Lei 25/2016, iha Edifisiu MJDK, Kinta (11/01/2024).

Ministru ne’e esplika, aktu tomada de pose ida ne’e ba MJDAK liu-liu ba diresaun jeral Juventude no Desportu nu’udar primeiru vez akontese, tanba transformasaun husi SekretariA Estadu ida iha governasaun hirak liu ba.

“Tanba ida ne’e funsionariu sira hotu iha ministériu ida ne’e, labele hare aktu ida ne’e hanesan aktu normal iha instituisaun publiku ida, maibe oinsa ita atu hasa’e no mellora instituisaun ida ne’e ninia profisional servisu hodi servi ba povo tomak,” dehan ministru, Kinta (11/4/2023), iha Resinu MJDAK Lecidere, Dili.

Governante ne’e esklarese, aktu indika ema ba kargu de Xefia, troka ema, hasai ema, no muda posisaun de Xefia, buat sira ne’e hotu nu’udar moris organizasaun ka instituisaun publiku ida ida nian, ho objektivu atu hasae kapasidade instituisaun iha forma hotu-hotu, no hanesan mos modelo hanorin no formasaun ba kareira funsionariu publiku.

“Tanba ne’e imi hotu tenke hare aktu posse ida ohin, laos deit semata-mata ba deit interese funsionariu sira ne’ebe hetan fiar, ou hetan xefia iha ministériu ida ne’e, maibe aktu sira ne’e hotu nu’udar ekspesaun ba hadia ministériu hodi aumenta ita nia produtividade atendimentu publiku hodi fo Prioridade ba Programa Ministériu nian,” hateten Nelyo Isaac hodi apelo ba kargu diresaun no xefia sira tenke kuidadu hodi mantein sira nia integridade, loyalitas, disiplina no komitmentu ba sira nia knar no servisu ho responsabilidade.

Entertantu, Prezidente Komisaun Funsaun Públika (KFP), Agustinho Letêncio de Deus hatete ba empozadu sira hotu katak atu hatudu prestasaun servisu tamba Konsellu Ministru foin lais ne’e aprova ona funsionariu publiku ho grauk kiik mos bele ona asumi kargu dirijenti.

“Grau kiik sira mos iha deretu hanesan wainhira nia iha kapasidade hodi asumi kargu, nia bele hetan konfiansa, tamba ne’e buat hotu hare ba prestasaun servisu,” hateten Agustinho de Deus.

Diretor Jeral  Ba Desportu, João Rodrigues, hateten iha nia programa servisu sei kordena hamutuk ho diresaun nasional ne’ebe tutela ba nia hodi bele implementa ona programa MJDAK tuir OJE 2024.

“Ita iha planu ba 2024 ho orsamentu ne’ebe la bo’ot liu, maibe naton ba ita halo aktividades, no iha inisiu fevereiru ita bele hahu ona aktividades desportu iha Timor,” hateten João Rodrigues.

Parte Diresaun Jeral Desportu, esplika João Rodrigues, nia mos sei kordena ho Konfederasaun Desportu (CDTL, red) ho Komisaun Desportu Nasional hodi hare kondisaun federasaun sira, liliu ba nivel organizasaun nian.

“Tuir dadus ne’ebe agora ita iha kuaze 37 federasoens ne’ebe rejista ona iha konfederasaun desportu, ne’ebe hosi parte Ministéiriu sei halo kordenasaun ho komisaun desportu, hodi ita bele hare hotu federasaun hotu nia kondisoens ne’ebe mak agora ita iha dadaun para tuir mai ita estabelese no rezolve tia nivel organizasaun atu nune’e 2025  ita hahu ho dezemvolve aktividade lubuk iha 2025,” nia dehan.

Programa importante balun maka oinsa halo preparasaun ho CONTL ba partisipasaun atleta Timor-Leste iha jogu Olimpiku Paris 2024.

Iha Lei Organiku DL N. 69/2023 MJDAK nian, iha Diresaun Jeral 4 maka Diresaun Jeral  Servisu Koorporativu, Diresaun Jeral Juventude, Diresaun Jeral Desportu no Diresaun Jeral Arte no Kultura ne’ebe tutela ba Sekretaria Estadu Arte no Kultura.

Diretor Jeral nain 4 ne’ebe simu posse ne’e maka Isabel Aldaziza Fatima Rodrigues Ferreira (Servisu Koorporativu), David Tomas de Deus (Juventude), João Rodrigues (Desportu), , no Gil Paulino dos Santos Oliveira (Arte no Kultura).

Diresaun Jeral Servisu Koorporativu fahe ba Diresaun Nasional 4 hanesan, Diresaun Nasional Jestaun Finanseira, Diresaun Nasional Administrasaun no Rekursu Humanos, Diresaun Nasional Patrimoniu, Logistika no Infraestrutura, no Diresaun Nasional Planeamento no Kooperasaun.

Diresaun Jeral Juventude nia maka Diresaun Nasional Assosiativismo Juventude no Diresaun Nasional Desemvolvimento Juventude.

Diresaun Jeral Desportu nia maka Diresaun Nasional Desportu Federadu no Diresaun Nasional Desportu para Todos.

Ba Diresaun Jeral Arte no Kultura maka, Diresaun Nasional Patrimoniu Kultural, Diresaun Nasional Biblioteka no Museum, ho Diresaun Nasional Promosaun Arte no Kulturas.

Alende Diresaun Jeral 4, iha mos Gabinete ne’ebe dereta ba ministru maka Gabinete Komunikasaun no Informasaun, Gabinete Juridiku, Gabinete Inspesaun no Auditoria, no Unidade Aprovisionamentu. No mos iha Komisaun Nasional Desportu ne’ebe servisu dereta ho Ministru.