PN-Igreja Katolik Sei Hamosu Lei Regula Liberdade Relijiaun

Dili, www.news-viptv.com – Atu regula prezensa relijiaun sira iha Timor-Leste ne’ebe maioria Katolika, Parlamentu Nasional (PN) no Igreja Katolika sei hamosu lei hodi regula Liberdade relijiaun nian.

Prezidenti PN, Fernanda Lay hateten, iha nia hasoru malu ho Arcebispo Metropolitana Dom. Virgílio Cardeal do Carmo da Silva, SDB, Igreja Katolika hare duni katak presiza lei ruma hodi regula Liberdade Relijiaun iha Timor-Leste.

“Liberdade relijiaun, ida ne’e tenke regula tanba nasaun seluk mos iha,” dehan Fernanda Lay ba jornalista sira iha salaun Arquidiocese Metropolitana de Dili, Kinta, (4/01/2024).

Alende sei hamosu lei hodi regula Liberdade relijiaun, iha PN nia konsultasaun ho parte Igreja Katolika persiza mos assuntu LGBT (Lesbian, Gay, Bi-sexual no Transgender) ne’ebe sai mos isu mundial, inklui mos isu HIV-SIDA no soe bebe.

“Ita nia posisaun oinsa, situasaun ita nian nusa, liga ho ita nia kultura  ne’e oinsa, liga ho Juventude, tanba ho problema moras kontadiosa  prosistituisaun, ne’ebe liga ho osan ho ita nia nesesidade basiku. Osan obriga ita nia sossiedade mos iha Pratikas balun ke ita tenke regula nia aspektu para la bele proteze sira hosi moras kontadiosa, no HIV-AIDS, ida ne’e importante liu ba ita nia sossiedade no Juventude nian ne’ebe soe bebe,” hateten prezidenti PN ne’e.

Nia hatutan, “Hau hanoin ita tenke tau matan no sai prekupasaun sosiedade Timorense tanba ita nia kultura laos hanesa nee, ne’ebe  ami senti katak ho kosultasaun ne’ebe Parlamentu halo ho igreja, liu-liu ho diocese tolu bele fo ajuda mos ami ho hanoin saida  mak bele halo hamutuk ba estadu Timorense hodi proteze ita nia kultura no sosiedade, ida ne’e mak importante”.

Iha fatin hanesan, Arcebispo Metropolitana Dom. Virgílio Cardeal do Carmo da Silva, SDB hateten konaba asuntu lei liberdade relijioza nian ne’e deskuti ona iha tempu matebian Dom. Basilio do Nacimento ne’ebe sai mos preokupasaun uma kreda nian, maski ohin loron sedauk iha lei hodi regula Liberdade relijiaun nian.

“Ita hotu hatene katak iha relijiaun barak mak tama mai iha ita nia rai laran, iha fatin hotu-hotu kuandu lei ida regula, tenke hatene tuir ida tama mai ne’e nia igreja ne’e iha ne’ebé  no nia ema ne’ebé no mai husi ne’ebé nia mai karik ema nain hira atu loke nia igreja iha ne’ebé iha Timor. Laos tama mai mak obriga sarani sira tama ida ne’e fo osan ba sarani sira, maibe nu’udar nasaun demokratiku ita mos tenke iha lei ida ba buat ne’ebé mak bele tama no labele tama,” dehan Dom Virgilio.

Liga konaba halo relasaun sekxual ho livre no soe bebe, parte igreja prontu atu kopera ho PN hodi oinsa hadia sosiedade sira nia hahalok no hamenus buat hirak ne’ebé mak lao iha rai laran.