PN Hili ona nia Reprezentante KSDS

DILI, www.news-viptv.com – Parlamentu Nasionál (PN) hili ona nia reprezentante ba Konsellu Superior Defeza no Seguransa (KSDS) liu hosi sesaun plenaria ordinaria, Segunda (28/8/2023).

Iha votasaun, peprezenta sira ne’ebé eleitu mak Deputadu Duarte Nunes (CNRT), Deputada Maria Terezinha Viegas (CNRT) no Deputadu David Mandati Dias Ximenes (FRETILIN), ne’ebé propostarefere aprezenta husi Bankada CNRT ho FRETILIN ho votos a favor 53 no 2 votu branco.

Alende hili reprezentante KSDS, Bankada KHUNTO iha sesaun plenaria halo deklarasaun politika kona ba merenda escolar ne’ebé presiza hadi’a no mellora nia atendementu inklui hahán ne’ebé saudável.

Bankada KHUNTO liu hosi deklarasaun Deputadu António Verdial lamenta ho programa merenda escolar ne’ebe maski governu anterior hasa’e ona montante osan ba kada estudante dolares sentavus 42, maibe estudante sira kontinua konsumu ai-han ne’ebe ladun kualidade.

“Estudante sira kontinua konsumu ai han ne’ebé kualidade ladun diak, li-liu ba oan estudante sira ne’ebé eskola iha Munisípiu iha foho areas rurais,” dehan Antonio Verdial.

Ho governu foun, deputadu ne’e husu ba ministerium relevante atu hare asuntu ne’e, inklui avalia ekipa jestaun ba programa merenda escolar ne’ebe laiha konesementu ba nutrisaun, aihan seguru, no ijene no sanitasaun nian.

“Partidu KHUNTO ne’e mós iha obrigasaun fo hatene ba governu no governu tenke halo responsabilidade hodi hadia failansu sira ne’ebé hakerek ona iha leten ne’ebé governu tenke hadia ninia mekanismu no Sistema,” hateten Antonio Verdial.

Komisaun D iha sesaun plenaria mos hatoo relatóriu fiskalizasaun ba Munisípiu Covalima relasiona ho perfurasaun mina-matan iha munisípiu refere refere no Komisaun F aprezenta relatóriu fiskalizasaun ba HNGV, SAMES relasiona ho falta ai-moruk reajente sira seluk.

Entretantu iha intervensaun diversa nian, Deputadu sira kontinua preokupa falta ai-moruk iha sentru saúde sira inklui HNGV, estrada ligasaun Viqueque, kondisaun eskola sira, situasaun seguransa iha kapitál Díli no asuntu importante sira seluk.

Sesaun plenária ne’e prezide husi Prezidente Parlamentu Nasionál interina, Maria Terezinha Viegas, akompaña husi membru Meza sira no hetan prezensa husi Vise-Ministru Asuntu Parlamentar, Adérito Hugo da Costa.