PM Xanana Hili Sergio Hornai Asumi Ministru Justisa

DILI, www.news-viptv.com – Primeiru-Ministru (PM), Kay Rala Xanana Gusmão aprezenta ona naran Sergio Hornai hodi asumi kargu Ministru Justisa troka saudozu Amandio de Sa Benevides.

Iha aprezentasaun naran Sergio Hornai nu’udar Ministru Justisa ne’ebe PM Xanana aprezenta ba Prezidenti Republika (PR) Jose Ramos-Horta, xefi estadu mos aseita ho figura Sergio Hornai ne’ebe antes ne’e asumi kargu nu’udar Komisariu Komisaun Anti Korrupsaun (KAK) periodu 2019-2023.

“Ha’u mai informa ba prezidente katak, kuarta-feira sinzas ne’e pontu toleransia ba funsionáriu sira, aban ami iha Konsellu-Ministru, kinta-feira mós Prezidente Ramos-Horta sei fó posse ba Ministru Justisa foun, Dr. Sergio Hornay,” informa PM Xanana hafoin hala’o enkontru ho PR Ramos-Horta, Segunda (12/2/2024), iha Palasiu Prezidensiál, Dili.

PM Xanana esplika, governu aprezenta naran Dr. Sergio Honay, tanba nia iha esprensia kona-ba setór justisa.

“Sergio Hornay, nia iha ona esprensia iha setór justisa nian, tanba ne’e maka nia ba atu hadia sistema jistisa ne’ebé sei fragil,” hateten PM Xanana.

Inkontru entre Xefi Estadu ho PM Xanana mos deskute preparasaun governu nian atu simu Papa Fransisco iha Aeroportu, Centru Kovensaun Dili, Tasi-Tolu no Igreja Katederál. Inklui mos hadia estrada iha área Tasi Tolu no hadia fatin serimónia.

“Ami deskute mós governu mós komesa halo ona preparasaun ba fatin atu simu vizita ofisiál Papa Fransisco nian tun hosi aviaun no karreta ki’ik ne’ebé Papa sei uza inklui hadia estrada no sei hadia fatin ne’ebé indentifika ona,” hateten xefi governu ne’ebe informa Governu sei kontinua hamutuk ho Delegasaun Organizadora Vaticano (DOV) no Igreja Katolika atu haree kondisaun fatin papa tun hosi aiviaun no karreta ne’ebé sei prepara ba Papa Fransisco.

Xefe Governu hatutan, Ministériu Obras Publika (MOP) komesa hadia estrada balun iha Kristu Rei no munisipiu balun tan.