PM Xanana Apela PN ho Membru Governu Kolabora iha Prosesu Adezaun ba ASEAN

DILI, www.news-viptv.com – Relasiona ona dezisaun ASEAN ne’ebe pronto simu ona Timor-Leste nian adezaun nudar membru plenu iha Outubru tinan ne’e, Primeiru Ministru Xanana Gusmao husu ba nia membru governu sira ne’ebe sedauk kompleta rekizitu balun, atu iha fulan hat nia laran bele finaliza ona.

Xefi Governu apela ba nia membru governu ne’e iha konferensia imprensa, Kuarta (28/5/2025), iha Salaun VIP Aeroporto Internasional Prezidenti Nicolau Lobato, hafoin fila husi simera ASEAN iha Kuala Lumpur, Malazia.

Nune’e mos nia husu ba Parlamentu Nasional atu tau prioridade ba lei ne’ebe presiza aprova relasiona ho adezaun Timor-Leste nian ba ASEAN atu bele aprova nune’e labele fo impaktu ba prosesu adezaun nian.

Maski sedauk sai membru plenu, Timor-Leste mos aseita ho ASEAN nian komprimisu ba paz entre membru nasaun sira.

Iha simera ASEAN ba dala 46, lider membru nasaun ASEAN sira konkorda ona atu simu Timor-Leste nian adezaun nu’udar membru plenu ba dala 11.

Timor-Leste iha nia prosesu adezaun hatama ona dokumentu aplikasaun desde tinan 2011, no iha tinan 2022 hetan estatutu nu’udar membru observador.

Nasaun membru ASEAN sira ne’e maka Indonezia, Malazia, Singapura, Filipina, Thailandia, Brunei Darussalam, Vietnam, Laos, Kambodia no Myanmar.