PD Sei Dezemvolve Setor Agrikultura, Turismu no Infraestrutura iha Ponta Leste

PONTA LESTE, www.news-viptv-com – Hare ba potensia Munisipiu Baucau iha area agrikultura, Partidu Democratico wainhira povu fo fiar hodi ukun iha governu, sei dezemvolve setor agrikultura no sei fahe tractor.

Alende dezemvolve setor agrikultura, Prezidenti Partidu Democratico Mariano Assanami Sabino mos promesa sei funsiona aeroportu Baucau hodi bele mos loke ba setor turismu nune´e Baucau mos bele sai destinasaun turista sira tantu nasional no internasional.

Entertantu Prezidenti CDN PD, Adriano Loromau mos hatoo plataforma politika PD nian ne´ebe sei projeta partidu ne´e wainhira tuur iha governu.

Remata nia kampana eleitoral iha Baucau, ba Komisiu Politiku iha Lospalos, PD promesa ba Lautem oan sira sei fo prioridade hanesan iha setor agrikultura no turismu, inklui hadia infraestrutura sira iha munisipiu Lautem tomak, liliu estrada hosi Lautem too Lospalos.

Konsidera votos PD iha Munisipiu Viqueque maski la boot, PD agradese nafatin Viqueque oan sira ne´ebe kontinua fo nia konfiansa ba PD hodi bele lori partidu ne´e ukun hamutuk iha Governu.

Iha Viqueque, alende fo sai programa PD iha governasaun ne´ebe hanesan hatoo ona iha munisipiu sira seluk, PD iha komprimisiu boot maka oinsa tau matan ba traballador sira, liliu oinsa luta hasa´e salariu baziku ba traballador sira iha Timor-Leste, inklui sei halo lei hodi proteze diretu traballador sira.