Partisipa Olympic Games Tokyo 2020, Atleta Rusia Labele Uza Naran Nasaun, Bandeira ho Hino Nasional

VIPTV, DILI – Atleta Rusia sira hetan bandu labele uza sira nia naran nasaun, bandeira ho hino nasional durante partisipa iha Olympic Games 2020 ne’ebe realiza iha Tokyo, Japaun.

Tuir publikasaun kompas.com, Rusia hetan sansaun hosi Tribunal Arbitrasaun ba Desportu (CAS – Court Arbitration for Sports) hodi labele partisipa durante tinan 2 iha eventu desportiva internasional sira tamba kazu dopping ne’ebe involve nia atleta sira ho involvimentu Governu Rusia nian.

Sansaun ba Rusia ne’e inklui iha Olympic Games Tokyo 2020, Winter Olympic Games Beijing 2022 no FIFA World Cup Qatar 2022.

Pena tinan 2 ba Rusia ne’e kaman uituan tamba antes ne’e, Organizasaun Mundial ba Anti-Doping (WADA) husu sansaun ba Rusia tenki ba tinan 4.

Sansaun ne’e sei remata iha 16 Dezembru 2022.

Durante Olympic Games Tokyo 2020, atleta Rusia sira kontinua hetan autorizasaun kompete, maibe uza fali naran ROC (Rusia Olympic Committee).

Iha Olympic Tokyo, atleta ROC sira hetan ona medalla hamutuk 50 kompostu hosi medalla osan mean (gold) 12, osan mutin (silver) 21, no osan metan (bronze) 17.