Olympic Games Tokyo 2020 I Lakon, Felisberto Halo Rekor Nasional Foun ba Nia Tempu

VIPTV, DILI – Atleta Olimpiku, Feliberto de Deus kontenti nafatin maski lakon kompete iha jogu olimpiku, tamba bele hadia nia tempu hodi hamosu rekor nasional foun ba Timor-Leste.

Iha Olympic Games 2020 Tokyo, Felisberto ne’ebe kompete iha heat 1, finish iha numeru 16 ho tempu halai 03:51.03.

“Hau halai diak, maski la manan, maibe hau orgullu bele hadia hau nia tempu hosi minutu 4:05 ba minutu 03:51,” dehan Felisberto ba VIPTV, Kuarta (4/8/2021), via whatsapp.  

Nia mos iha esperansa nafatin, hafoin kompete iha jogu olimpiku, sei treinu diak liu tan, nunee bele kompete iha SEA Games tuir mai.

Alende Feliberto, Timor-Leste mos haruka atleta olimpiku rua seluk maka Imelda Felychita Belo ho Jose da Silva Viegas.

Felisberto de Deus moris iha Ermera, 7 Junu 1999.Representa dala barak ona Timor-Leste iha eventu internasional tantu iha SEA Games, Asian Games no jogu kampionatu internasional balun.

Partisipasaun Timor-Leste iha jogu Olimpiku desde tinan 2000 wainhira haruka nia atleta Marathona Aguida Amaral uza bandeira IOC (Olimpiku Internasional) reprezenta Independent Olympic Athlete.