Normaliza Atendementu Passaporte, MJ Hola Tan Makina 2

DILI www.news-viptv.com – Hodi normaliza atendementu ba servisu produsaun Passaporte nian ne’ebe atraja tamba makina imprimi ne’ebe aat, Ministeriu Justisa hola tan makina 2 hodi bele normaliza atendementu passaporte nian. 

“Hau hakarak hateten katak makina rua sei mai iha tempu besik ita hola ona proseso administrativo sira kuaze konklui hein kompania atu kumpri nia dever sira hodi lori mai tamba kestaun administrativo,” dehan Ministru Justisa, Sergio Ornai, Sexta (5/7/2024), iha Uma Fukun Parlamentu Nasional.

To’o agora, publiku kontinua kritika servisu governu nian iha atendementu halo passaporte ne’ebe kontinua la iha rezultadu diak.

Ezemplu maka agendamentu online ne’ebe governu lansa, maibe ikus sistema labele halo atendementu.

“Hau nia passaporte ne’e fulan rua ona sedauk foti, servisu lolos fasil, maibe sira rasik maka halo sai problema bo’ot,” dehan Mario (naran bolu nian).

Nune’e mos Georgina Santos ne’ebe konsidera Ministeriu Justisa, liliu iha servisu atendementu passaporte viola ona diretu umanu labarik sira ne’ebe persiza halo passaporte, maibe laiha agendamentu online.

“Hau nia oan persiza halo passaporte tamba hau persiza lori nia ba assuntu familia nian, maibe sistema agendamentu online labele atende, ne’e viola ona diretu labarik nian tamba labele assesu ba passaporte,” dehan Georgina.

Prior liu tan, funsionariu sira kontratadu tamba deit foin servisu iha gabinete membru governu ruma, fasil los hodi assesu, maski sira mos balun la halo viazem ba rai liur, maibe ema bo’ot sira fasil fasilita ba malu.