Nelyo Isaac: GAM ba Desportu, Laos Bandalismu

DILI, www.news-viptv.com – Ministru Juventude, Desportu, Arte no Kultura, Nelyo Isaac Sarmento apela ba lideransa Grupu Arte Marsiais (GAM) sira atu kontrola nia membru tamba atividade GAM uza ba desportu, laos ba bandalismu.

Ba jornalista sira, Ministru Nelyo Isaac esplika, maski foin fulan 4 simu responsabilidade, governu atraves liu hosi MJDAK, hahu ona profesionaliza GAM hodi fo formasaun lideransa no sidadania ba membru GAM sira.

“Iha formasaun lideransa no sidadania, orienta ona, GAM ba atividade desportu, laos ba atividade bandalismu no baku malu,” hateten Nelyo Isaac, Segunda (6/11/2023), iha edifisiu MJDAK Lecidere, Dili.

Relasiona ho konflitu iha Lourba no Carabau, Governu mos sei hein informasaun detaillu hosi terrenu no Primeiru Ministru Xanana Gusmão mos koalia ona ba publiku katak sei tau asuntu ne’e ba reuniaun Konsellu Ministru hodi analiza.

Tamba ne’e, iha konflitu refere, sei buka hatene, karik iha duni membru (GAM) sira, inklui sira nia lideransa ou pelatih, maka involve sei fo sansoens tuir lei ne’ebe iha. No husu ba lideransa GAM sira atu hare mos ba membru sira katak problema pribavu labele lori mos ba organizasoens sira.

Ministru ne’e esplika, tempu ona membru GAM sira atu kontribui ba nasaun liu hosi prestasaun hodi hetan medalla iha rai liur.

Foin lais ne’e MJDAK liu hosi KRAM fo apoiu ba GAM IKS-PTL no PSHT hodi finansia atividade kampionatu nasional ne’ebe hetan partisipasaun hosi sira nia membru hosi minisipiu hotu.