Messi-Putellas the Best FIFA Players 2022 , VIP TV reprezenta Timor-Leste ba Votasaun

Dili, www.news-viptv.com – Prestasaun extra-ordinariu Lionel Messi ne´ebe lori Argentina sai kampiaun mundial FIFA World Cup 2022, lori  jogador ne´e manan tan premiu melhor jogador FIFA (the best FIFA  players 2022).

Iha nomisaun final, hafoin vota hosi jornalista desportu sira iha mundu tomak, Messi konsege hetan votos barak liu kompara Kylian Mbappé (Franca/PSG) no Karim Benzema (Franca/Real Madrid).

“Tinan ne´e “bulak” ba hau. Hau bele atinji hau nia mehi hafoin luta dala barak, buska dala barak, hau insiti nafatin. Furak ba saida maka akontese mai hau iha hau nia kareira,” komentariu Messi.

Ba kategoria feto nian, melhor jogador mana Alexia Putella (Espana/Barcelona) ne´ebe iha nomiasaun final halakon Beth Mead (Inglatera/Arsenal) no Alex Morgan (EUA/Orlando Pride/San Diego Wave)

Melhor jogador ne´ebe Putellas hetan ne´e ba daruak nian hafoin iha 2021 mos eleita ba women the best FIFA Players 2021, tamba nia susesu lori klubu Barcelona sai kampian tinan tolu tutuir malu.

Entertantu iha kategoria guarda redi, Baliza Argentina Emiliano Martínes ne´ebe susesu mos lori Argentina kampiaun ba FIFA World Cup 2022 maka manan ba premiu ne´e no ba feto hetan hosi Mary Earps hafoin lori Inglatera kampiaun ba UEFA Women’s EURO 2022 .

Iha treinador nian, kategoria feto nian, susesu ne´ebe Sarina Wiegman hodi lori Inglatera kampiaun ba EUFA Women´s Euro 2022 lori nia mos eleita ba melhor treinador FIFA nian.

Nune´emos Lionel Scaloni hosi Argentina aumenta kolesaun trophy nudar melhor treinador mane nian hodi rai hamutuk iha armaria ninian iha sorin taca Kopa Mundial foin lais ne´ebe nia oferese ba ekipa Tango.

Alende kategoria hat ne´e, FIFA mos fo premiu Puskas, Fair Play, no adeptus nian.

Golu fantastiku tinan 2022 lori Marcin Oleksy hosi klubu Warta Poznan, Polandia lori jogador ne´e manan Premiu Puskás. Entertantu, Jogador Georgia, Luka Lochoshvili hetan The FIFA Fair Play Award nu´udar rekonesementu ba reasaun ninian wainhira joga ba Wolfsberger wainhira jogador adversariu monu desmaia no Luka ajuda kedan.

Adeptus Argentina hetan rekonesementu ba sira nia supporta ba sira nia selesaun durante FIFA World Cup 2022 no tokon ba tokon adeptus simu sira nia eroi wainhira fila ba Buenos Aires.

Melhor jogador, guarda redi, treinador hili liu hosi prosesu votasaun iha ne´ebe grupu hat iha votos hanesan, adeptus futebol, representante media ne´ebe akredita, no treinador selesaun nasional hosi nasaun hotu iha mundu.

Jornalista senior Evangelisto Gantry dos Santos Meilana mos hetan rekonesementu no VIP TV media ne´ebe nia haknar an ba hetan akreditasaun nu´udar media ne´ebe hili hosi FIFA hodi sai mos juri votasaun ba kategoria feto nian ba  The Best FIFA Football Awards 2022.

“Onra no orgullu FIFA nu´udar organizasaun futebol mundial bele rekonese prezensa VIP TV no hau hodi bele hola parte iha eventu istoriku FIFA nian ne´e hodi halo votasaun ba kategoria feto nian hamutuk ho jornalista desportu iha mundu hotu,” komentariu jornalista senior ne´ebe konesidu ho naran bolu Gantry.

Gantry esplika, maski iha Timor-Leste sempre envolve iha kobertura futebol nasional, maibe FFTL ou orgaun liga sira nunka involve nia ba ekipa ruma ne´ebe hili melhor jogador nian.

“Durante ne´e nem FFTL ou orgaun liga nunka envolve hau, maibe FIFA liu hosi kontaktu dereta liu hosi karta e-mail hili hau atu bele involve mos iha votasaun premiu ne´e, no hau mos simu,” dehan Gantry.

Iha seremonia ne´e mos Gantry hetan konvite hodi bele mos prezensa iha Paris, Franca fatin ne´ebe FIFA realiza eventu ba premiu ne´e nian. Maibe, tamba okupadu ho servisu labele hatan ba konvite refere.     

Seremonia The Best FIFA Football Awards 2022 halao iha Paris, 27 fevereiru 2023.

Rezultadu kompletu:

• The Best FIFA Women’s Player: Alexia Putellas (Spain/FC Barcelona Femení)
• The Best FIFA Men’s Player: Lionel Messi (Argentina/Paris Saint-Germain FC)
• The Best FIFA Women’s Goalkeeper: Mary Earps (England/Manchester United WFC)
• The Best FIFA Men’s Goalkeeper: Emiliano Martínez (Argentina/Aston Villa FC)
• The Best FIFA Women’s Coach: Sarina Wiegman (England Women’s National Team)
• The Best FIFA Men’s Coach: Lionel Scaloni (Argentina Men’s National Team)
• The FIFA Puskás Award: Marcin Oleksy (Poland/Warta Poznań)
• The FIFA Fair Play Award: Luka Lochoshvili (Georgia/Wolfsberger AC/U.S. Cremonese)
• The FIFA Fan Award: Argentinian Fans