Martinho Gusmão Halo Dialogu ho Komunidade Kristaun Protestante

DILI, www.news-viptv.com – Rekonese Kristaun Protestante nudar organizasaun relijioza ida ne’ebe ejisti mos iha Timor-Leste, Martinho Gusmão halo dialogu ho Komunidade Protestante hosi Igreja Bethel Timor-Leste Mota Jordau Salva Klamar, Kinta (24/2/2022), iha Bebonuk, Dili.

Dialogu ne’ebe Martinho Gusmão halo relasiona ho nia kandidatura ba prezidenti republika hodi hatoo nia vizaun no hakarak hakuak  organizasaun no komunidade relijioza maski ho nueru minoria iha Timor-Leste.

Iha dialogu ne’e, Martinho Gusmão simu deretamente hosi Pastor Ernesto da Costa nudar bibi atan ou responsavel jeral ba Igreja Bethel Timor-Leste Mota Jordau Salva Klamar.

Nudar eis bibi atan mos iha Igreja Katolika, Martinho Gusmão ne’ebe nia rezignasaun mos hetan aseitasaun hosi Amu Papa Francisco, Kandidatura Prezidenti Republika ho numeru sorteiu ne’e esplika iha nia kandidatura iha programa 3 ne’ebe importante maka edukasaun, justisa no paz.

Pastor Ernesto da Costa hafoin dialogu ne’e esplika katak sira senti kontenti ho prezensa kandidatu prezidenti republika Martinho Gusmão iha sira nia igreja hodi esplika deretamente kona ba vizaun no saida maka nia sei halo wainhira eleitu ba prezidneti republika.

Nudar lider Kristaun Protestante hosi Sinodu Bethel Timor-Leste hateten, Timor-Leste dadauk ne’e persiza duni lider id aba Prezidenti Republika ne’ebe hamtauk Maromak no moris tuir dalan Nai Jesus Kristu nia dutrina ne’ebe konsagra ona iha Biblia nudar livru vida moris Maromak nian ba Nia ema kriatura sira.

Tuir planu, Martinho Gusmão sei hahu nia abertura kampana iha Mehara, Munisipiu Lautem ho razaun hosi ne’eba maka Maromak nia atan ida hahu fo nia bensaun ba Kay Rala Xanana Gusmão hodi lidera luta libertasaun Timor-Leste kontra okupasaun militar Indonesia.

Reporter: Evangelisto Santos Meilana  I  Cameraman: Marcos dos Santos