Manifestante “Manan” Halakon Lei Pensaun Vitalisia Kontra Parlamentu Nasional

Dili, www.news-viptv.com – Ejijensia principal 4 ne’ebe sai agenda estudante universitariu sira iha Timor-Leste durante sira nia manifestasaun loron tolu lori duni rezultadu diak ba vida moris povu nian ne’ebe ikus bankada sira iha Parlamentu Nasional sei halakon Lei Pensaun Vitalisia.

Hafoin kansela sosa kareta ba deputadu parlamentu nasional, manifestante ne’ebe involve mos movimentu sosiais sira kontinua ejiji ba Parlamentu Nasional ba pontu 3 seluk ne’ebe seidauk hetan resposta, maka halakon Lei Pensaun Vitalisia, Altera Lei Manifestasaun liliu ba artigu distansia manifestasaun nian no aloka osrsamentu jeral estadu ba setor produtivu.

Ba pontu 3 ikus, Deputadu Bankada 5 iha Parlamentu Nasional simu reprezentante manifestante hodi aseita ejijensia sira ne’e, inklui halakon Lei Pensaun Vitalisia ne’ebe benefisia deit ba eis titulares no nia familia sira.

Manifestasaun iha loron datoluk lao ho pasifiku no laiha ona konfrontasaun entre manifestante ho autoridade seguransa ne’ebe asegura area Parlamentu Nasional.

Ba Lei Pensaun Vitalisia no alterasaun lei manifestasaun ba artigu balun, Parlamentu Nasional sei lori ba plenaria iha 25 Setembru 2025.