Lansa Projetu Drainajen D4, Governu Garante Sei Laiha Tan Inundasaun

DILI, www.news-viptv.com  –  Governu iha lansamentu projetu projetu drainajen (D4) hahú hosi área Caicoli tun to’o iha Portu Díli, garante sei laiha tan inundasaun ba komunidade iha area Caicoli wainhira tempu udan.

Iha lansamentu projetu ne’ebe halo iha Portu Dili, Segunda (8/9/2025), partisipa husi Primieru-Ministru, Kay Rala Xanana Gusmão akompaña hosi Ministru Obras Públikas (MOP), Samuel Marçal, durante ne’e Primeiru-Ministru preokupa tebes tanba tinan barak nia laran bainhira tempu udan sempre bee nalihun, taka tomak estrada, hoban uma komunidade, tanba ne’e mak ohin ofisialmente lansa ona projetu drainajen ne’e atu bele akumula bee ho volume boot tun direta bá tasi laran.

“Xefe Governu fiar katak, ho projetu ida-ne’e, bainhira finaliza sei laiha tán risku inundasaun bá komunidade iha área Caicoli,” hakerek komunikadu imprena ne’ebe redasaun asesu.

Hahú ohin kompañia implementadór komesa projetu drainajen ne’e no PM Xanana fó atensaun atu servisu ho kualidade, tanba osan ne’e povu nian.

Tuir planu, projetu reabilitasaun drainajen ne’e hahú hosi área Caicoli parte postu Polísia nian iha edifísiu PCIC, sei loke luan metru haat to’o iha tasi ibun Portu Díli.

Partisipa iha serimónia lansamentu ne’e Prezidente Komisaun Ezekutiva, Bee Timor-Leste, Empreza Públika (BTL,E.P), Gustavo da Cruz ho estrutura, Diretór DEI BTL,E.P no seluk-seluk tán.