Lansa Projetu Avansa SAN, USAID Apoia Milliaun US$ 15 ba Timor-Leste

Dili, www.news-viptv.com – Atu aselera fortalesimentu ai-han lokal, Estadus Unidus Amerikanu (EUA) kontinua nia komitmentu hodi fo apoia osan milliaun US$ 15 ba Timor-Leste hodi apoia projetu Avansa Sistema Ai-han no Nutrisaun (Avansa SAN).

Lansamentu ba projetu Avansa SAN ne’e lansa dereta hosi  Prezidente Republika, Jose Ramos-Horta hamutuk Vise Primeiru Ministru no Enkaregadu Negósiu Embaixada Estadu Unidos Amerikanu, Marc Weinstock, Kuarta loron 20 fulan marsu, iha Timor Plaza, Dili.

Projetu Avansa SAN ne’e lansa hodi promove Timor-Leste ninia Sistema Ai-han hadiak nutrisaun no hametin seguransa Ai-han iha nasaun laran tomak ho foku ba iha munisipiu haat (4) mak hanesan, Aileu, Ainaro, Dili no Ermera.

Iha nia implementasaun, Projetu Avansa SAN sei implementa hosi National Cooperative Business Association CLUSA International ho koloborasaun husi grupu agrikultór 27 iha suku 14. Ho servisu hamutuk, aktividade ida ne’e sei hari aliserse ba progresu, prosperidade no hadia nutrisaun ba ema hotu.

Liu husi USAID, Embaixada EUA kontribui ona osan hamutuk Miliaun US$ 92 entre 2021 to 2025, hodi hadia ekonomia Timor-Leste nian no promove governasaun diak. Dezde restaurasaun Independensia Timor-Leste nian, USAID kontribui ona liu Millaun US$ 323 hodi promove dezemvolvimentu inkluzivu pasifiku atu nasaun ne’e prósperu, saúdavel, no autosufisiente.