Labele Repete, PM Xanana fo “Perdaun” ba Membru PNTL Ne’ebe Jura ba Partidu

DILI, www.news-viptv.com – Relasiona ho notifikasaun membru Polisia Nasional Timor-Leste (PNTL) nain 56 ne’ebe halo juramentu ba partidu politiku ida, Primeiru-Ministru (PM) Xanana Gusmão fo “Perdaun” no sei la kastigu membru polisia refere. 

Iha nia mensajem wainhira vizita Sentru Formasaun Polisia iha Comoro, PM Xanana hateten, ba sira ne’ebe halo ona juramentu, governu sei la fó kastigu ka hasai oknum sira ne’e, maibé apela ba sira atu labele ona inklina ba partidu ida no kumpri nia misaun tuir artigu 147 Konstituisaun RDTL katak polisia ho forsa seguransa tenke defende legalidade demokratika no garante seguransa interna ba sidadaun hotu no la inklina ba partidu politika ka grupu ruma.

Tamba ne’e atu lori hikas konfiansa ba povu hodi fiar nafatin, PNTL maka PM Xanana husu atu membru polisia hametin unidade no servi deit maka polisia no nasaun.

“Ita mai hasoru malu laos atu husu fo kastigu bai mi, maibe atu hanoin deit katak, iha estadu diretu demokratiku tenki iha hanoin metin ida atu orienta sira nia servisu, hanoin ne’e maka atu servi deit povu ida ne’e no rai ida ne’e,” dehan PM Xanana, Kinta (17/8/2023), iha Sentru Formasaun Polisia Comor, Dili.

Xefi ezekutivu governu ne’e mos hateten, polisia, forsa no instituisaun independente sira hanean justisa labele sadere ba partidu ida. Ida-idak nudar sidadaun bele iha nia eskolla, nia hili ida ne’ebe nia gosta ida ne’e no fiar ida ne’eba, maibe polisia no forsa labele abertamente tama iha partidu, tama iha politika, tamba persiza teb-tebes independensia iha instituisaun sira ne’ebe defende povu tomak.

“Atu povu bele fo fiar ba ajende polisia no forsa military sira, ita tenki hatudu ba publiku katak, imi nia misaun atu servi no proteje, ne’e misaun ida sagradu,” dehan PM Xanana.

Governu, esplika PM Xanana, sei la husu ba komandu PNTL atu halo investigasaun ba membru sira, maibé husu responsabilidade ba komandante PNTL hotu atu hadia komportamentu membru tomak.

“Mai iha ne’e laos mós atu hamoe imi, maibé mai iha ne’e atu hamutuk fó konfiansa ba povu bele fiar fali sira. Ita la julga malu, hau sei la husu kona-ba ida ida nia hakarak ou obrigasaun husi ema ruma hodi tama iha partidu. Maibé, nu’udar Primeiru Ministru, ha’u husu mós responsabilidade ba komandantes superior sira, ha’u sei tau matan no haree hahalok sira atu lori polisia ba servi no proteje povu, se kuandu la proteje didiak mak sei xamada atensaun katak, la merese atu servisu iha polisia,” apela PM Xanana.

Nu’udar xefo governu, nia enkoraja membru PNTL sira hahú ohin ba oin taka tiha pajina foer horseik ninian, loke fali pajina foun ba aban bainrua nian, tanba membru polisia hotu kompremetidu ho missaun ida, la halo politika no la partense ba partidu ida maibe serve deit povu no rai ida ne’e hodi kontribui ba paz no dezenvolvimentu.

PM Xanana mos apela ba Komandu F-FDTL atu prepara rekursu hodi asegura seguransa ba rikusoin Timor iha tasi laran, tanba governu dadaun ne’e foka hela atu dada mina hosi plantasaun great sunrise mai Timor-Leste.

Hola prezensa iha PM Xanana nia vizita ne’e, Komandante Jerál PNTL,Komisáriu Jerál Henrique da Costa, Xefe Estadu Maiór Jenerál F-DTL Tenente Jenerál Domingos Raul Falur Rate Laek, Ministru Interiór, Fransisco da Costa Guterres, Ministru Defeza, Pedro Klamar Fuik, Ministru Juventude, Desportu, Arte no Kultura, Nelyo Isaac Sarmento, Ministru assuntu Kombatentes Libertasaun Nasional, Gil da Costa Monteiro “Oan Soru”, no komandante PNTL munisipiu no unidade tomak hala’o enkontru hodi buka solusaun ba problema ne’ebé Komandu PNTL hasoru no deskute mós planu no programa PNTL nian ba oin.

Total membru PNTL atual hamutuk 4.165.