La Publika Rezultadu Eleisaun, PR Horta Kestiona STAE

DILI, www.news-viptv.com – Prezidenti Republika (PR) Jose Ramos Horta kestiona ho servisu transparansia Sekretariadu Tekniku Administrasaun Eleitoral (STAE) iha publikasaun rezultadu eleisaun parlamentar nian iha 21 Maiu 2023.  

“Dala ida tan, hau surprende ho transparansia minimu no kualidade ba divulgasaun rezultadu eleisaun hosi STAE,” hakerek xefi estadu iha nia pajina Facebook ne´ebe publik aiha oras ida liu ba.

STAE, esplika xefi estadu, iha ona data balun hosi munisipiu hotu, no mos kontazem ne´ebe iha ona hosi diaspora, inklui Munisipiu Aileu ho Atauro, ne´ebe la publika.

“Data ne´ebe iha ba publiku, total nasional nian. Tamba sa, sira (STAE) la publika data real-time nian hosi munisipiu,” kestiona xefi estadu.

Ema numeru ida ne´e mos kestiona ho STAE ne´ebe halo diskriminasaun iha media ne´ebe fo deit link apuramentu nian ba deit RTTL.

“Media hotu tenki iha asesu ne´ebe hanesan no labele obriga hodi foti fali hosi enkran televisaun ou deretamente ba STAE hodi foti foto TV iha resepsaun,” dehan xefi estadu.

Ikus xefi estadu kestiona tamba sa STAE la loke link apuramenyu ba publiku nune´e sidadaun hotu tantu iha rai laran no rai liur bele akompana apuramentu ne´e.

“Situasaun ne´e laloos,” hakerek PR Horta hodi taka.

Iha eleisaun parlamentar 21 Maiu 2023, hamutuk iha partidu politiku 17 maka konkore. No iha rezultadu apuramentu nian, iha ona apuramentu final hosi Munisipiu Aileu no Atauro ne´ebe Partidu CNRT maka sai nia vensedor.

Partidu politiku 17 sira maka:

1. Partido Desenvolvimento Nacional (PDN)
2. Partido Liberta Povu Aileba (PLPA)
3. Partido Libertação Popular (PLP)
4. Partido Democratico (PD)
5. Partido Kmanek Haburas Unidade Nacional Timor Oan (KHUNTO)
6. Partido Os verdes de Timor (PVT)
7. Partido União Democratica Timorense (UDT)
8. Partido Unidade e Desenvolvimento Democratico (PUDD)
9. Partido Republicao (PR)
10. Partido Unidade Nacional Democratica da Resistencia Timorense (UNDERTIM)
11. Partido Frente Revlucionaria Timor-Leste Independente (FRETILIN)
12. Partido Congresso Nacional da Reconstrução Timorense (CNRT)
13. Partido Centro Ação Social Democrata Timorense (CASDT)
14. Movimento Libertação do Povo Maubere (MLPM)
15. Partido Socialista Timor (PST)
16. Partido Democrata Cristão (PDC)
17. Partido Associação Popular Monarquia Timorense (APMT)