Kontinua Treinu Subar, KRAM Sei Notifika Lideransa GAM 3

DILI, www.news-viptv.com – Relasiona ho atividade no treinu subar ne’ebe kontinua halao hosi Grupu Arte Marsiais (GAM) 3, Komisaun Reguladora Arte Marsiais (KRAM) sei notifika lideransa hosi PSHT, IKS-PTL, no KORK.

Prezidenti KRAM, Octavio da Conceição informa, bazeia ba Rezulusaun Nº. 45/2023 ne’ebe hasai iha 10 Novembru 2023 ne’ebe suspende atividade GAM, KRAM detekta no simu informasaun katak GAM 3 la kumpri rezolusaun governu nian ne’e.

“Komisaun Reguladora Arte Marsiais  detekta no simu informasaun hot-hotu hosi Sub-Estrutura, Sub-KRAM Munisipiu sira katak, Organizasaun PSHT nia membru  sira  kontinua halo aktividade treinamentu subar-subar, hatais farda lao iha bairu laran, no kontinua halo publikasaun iha media sosial sira, provokasaun entre  arte marsiais ho arte ritual sira,” dehan Octavio ba jornalista sira iha konferensia Imprensa, Tersa (05/03/2024), iha edifisiu KRAM Lecidere, Dili.

Alende PSHT, KRAM mos identifika membru IKS-PTL ho nia treinador sira, fo treinu subar-subar iha fatin ida ba fatin ida.

“Presidente KRAM, husu ho respeita ba lideransa ho estrutura nasional PSHT, IKS-PTL, KORK, atu respeita  ordem estadu nian liu husi Rezolusaun Nº. 45/2023, atu obedese mos ba regulamentu hotu-hotu no liu-liu ba iha Lei Nº. 5/2017 no artigo 32 koalia kona ba koloborasaun husi lideransa no treinadora sira, dever  koloborasaun, husu mos  ba sira atu bele kumpri rezolusaun, no kuandu sira sei la kumpri  nafatin maka, tuir Lei Nº. 5/2017 no artigo 9 hateten katak, Komisaun Reguladora Arte Marsiais iha kompitensia  atu hato’o parese legal no parese favoravel sira ba sua exellensia MJDAK hodi  aprezenta ba iha Konsellu Ministru hodi foti desizaun sira tuir mai, ida ne’e hatete katak rezolusaun Nº.45/2023, ne’e sei remata iha 10 Abril tinan ne’e,” esplika Prezidenti Kram ne’e.

Ho ne’e, KRAM husu ba GAM 3 tolu atu kumpri rezolusaun ne’e, se lae KRAM sei rekomenda katak falta de dez-obidensia, falta koloborasaun, falta Disiplina, falta dez ordem ba orden estadu nian.

“Iha tempu badak Komisaun Reguladora Arte Marsiais sei notifika lideransa arte marsiais  tolu atu kontrola sira nia  aktividades ho sira nia membru nia atitude sira para nunu’e bele foo biban no fo razaun ba Komisaun Reguladora Arte Marsiais hodi aprezenta rekomendasaun sira no parsere favoravel ba Sua Exselensia MJDAK hodi aprezenta ba Konsellu Ministru iha 10 Abril,” nia informa.