Konsellu Ministru Aprova Merenda Eskolar Kada Alunus 42 centavos

DILI, www.news-viptv.com  – Konsellu Ministru iha surumutu Kuarta (27/72022) aprova projetu lei ne´ebe apresenta hosi Ministru Edukasaun, Juventude no Desportu, Armindo Maia kona ba programa merenda escolar.

“Programa merenda eskolar nu’udar subsidiu ida ne’ebe fo iha ambitu asaun sosial eskolar, ne’ebe ho objetivu hodi asugura direitu han loron loron no hahan ne´ebe saudavel ekilibrada no indispensavel ba desenvolvimentu no insetiva partisipasaun labarik iha edukasaun pre-eskola no iha ensinu bàziku no particular. Montante ne´ebe atribui iha ambitu programa merenda eskolar fiksa iha US$ 0,42 ba kada loron hanorin no ba kada alunu,” dehan Ministru Presidensia Konsellu Ministru, Fidelis Magalhaes iha konferensia imprensa, Kuarta (27/7/2022), iha Palasiu do Governo, Dili.

Ministru Fidelis mos informa, Konsellu Ministru aprova hotu projetu proposta rezolusaun parlamentu nasional ba ratifikasaun akordu kompaktu Millennium Challenge, ne´ebe apresenta husi nia rasik.

“Pakote koperasaun ne´e asina ona iha loron 19 Jullu liu ba sei ezekuta durante tinan lima no iha montante global US$ 484 miliaun. Programa ne´e sei hare ba komponente prinsipal rua ida atu hadia sistema be´e, saneamentu no drenajen no ida seluk iha area edukasaun no formasaun nian,” esplika Ministru Fidelis.

Projetu lei seluk ne´ebe nia apresenta no hetan aprovasaun mos kona ba suplementu remuneratório ba funsionário públiku no ajente sira administrasaun publiku nian nebe hala’o sira nia funsaun hanesan formador iha Administrasaun publiku.

“Projetu dekretu lei ida ne’e ho nia objetivu atu estabelese rejime ida ne’ebe fo retribuisaun finanseira ba responsabilidade no kompleksidade ne’ebe boot funsionariu no ajente publiku administrativu sira nian ne’ebe envolve iha realizasaun formasaun jeral ka espesializada suplementu foun ida ne’e hakerek atu aproveita diak liu kapasidade formadora ne’ebe oras ne’e daudaun iha ona Iha administrasaun publika national nia laran,nunee hodi kintribui ba resionalizasaun rekursu nasional sira,” dehan Fidelis.

Konsellu Ministru mos aprova mos projetu lei ne’ebe apresenta husi ministru administrasaun Estatal, Miguel Pereira de Carvalho, projetu dekretu lei, ne’ebe apresenta husi Ministru Finansas Rui Augusto Gomes no Ministra Saude, Odete Maria Freitas Belo, ho objetivu atu estabelese rejime juridiku parseria publiku privadu (PPP) servisu diagnostiku nian.

“Konsellu Ministru aprova ona projetu Resolusaun governo ne’ebe mos apresenta husi Ministru Finansas, Rui Agusto Gomes ne’ebe estabelese valor masimu selu ba alkizasaun beins imoveis (uma sira) nian no tamba lakon edifisiu, benfetoria, area sira Floresta tamba tenki hapara atividades sira hanesan pekuaria, no peskas no foti masin iha area emplementasaun projetu kualifikasaun Aeroportu international Prezidente Nicolau Lobato,” nia dehan.

Hosi Ministru obras públika, Abel Pires da Silva, konsellu ministru aprova ba alternasaun dahuluk ba dekretu lei nu 11/2006, 12 Abril kona ba kriasaun institutu jestaun ekipamentos Timor-Leste no aprovasaun ba Nia estatutu ida idak.

“Objetivu husi alternasaun mak atu kontabiliza estatutu IJE nian no define ona iha dekretu lei organizasaun administrasaun direita ho indireita ho organika governo konstituisional VII no konfere kompetensia foun sira nebe sei permite hodi aumenta rekursu sira IJE nian hodi hadia servisu públiku nebe estadu fo ba sidadaun sira,” dehan Fidelis.