Komunidade ASEAN Komitmentu Fo Assistensia Kapasitasaun ba Adezaun TL

DILI, www.news-viptv.com – Komunidade Association South East Asian Nations (ASEAN) iha nia selebrasaun aniversariu ASEAN ba dala 55, afirma hikas nia komitmentu hodi fo assitensia kapasitasaun ba Timor-Leste.

Komitmentu ASEAN nian neé hato´o deretamente hosi Embaixador Thailandia, Tam Poolpipat iha nia deskursu representa embaixador hosi estadu membro ASEAN ne´ebe loke nia embaixada iha Timor-Leste.

“ASEAN komprometidu atu kontinua esplora dalan sira atu fornese asisténsia kapasitasaun no fasilita Timor-Leste iha ninia preparasaun ba adezaun ba ASEAN,” dehan Poolpipat, Segunda (15/8/2022), iha Embaixada Thailandia, Farol, Dili.

Embaixador ne´ebe mos louva Timor-Leste nia susesu sira iha harii estadu ida-ne’ebé forte no reziliente no promove pás no dezenvolvimentu sustentavel.

“Parabéns ba Governu no povu Timor-Leste iha okaziaun aniversáriu Restaurasaun Independensia Timor-Leste nian ba dala 20,” nia dehan.

Diplomata ne´e mos informa, ASEAN konsidera iha susesu hosi misaun esploratoriu (fact-finding mission) ne´ebe halo hosi Komunidade Sosiu-Kultural ASEAN nian (ASCC) no Komunidade Ekonomika ASEAN nian (AEC) ne’ebé hala’o iha Jullu 2022 no mós Komunidade Politiku-Seguransa ASEAN nian (APSC) ne’ebé hala’o iha Setembru 2019.

Entertantu, Prezidente Republika, Jose Ramos-Horta ne´ebe hato´o mos diskursu ba loron aniversariu ASEAN nian ne´e louva ASEAN ba ninia susesu sira iha ninia istória durante tinan 55 no ninia papél iha promosaun pás no estabilidade rejionál sira.

Xefi estadu neé hato’o ninia apresiasaun ba ASEAN iha ninia apoiu ba prosesu kapasitasaun Timor-Leste nian no hein ba rezultadu pozitivu husi avaliasaun ba Timor-Leste nia prontu-an atu tama ba ASEAN.

Ba jornalista sira, Ministra Negosiu Estranjeiru no Kooperasaun, Adaljiza Magno esklarese adesaun Timor-Leste ba ASEAN iha ona sinal pozitivu no ASEAN sira husu atu Timor-Leste kontinua prepara an nune´e bele preparadu liu tan wain hira sai ona full member.

“Ho aniversariu ne´e, sai tinan ikus ba Timor-Leste nudar laos membro ASEAN, no espera bele selebra loron aniversraiu ASEAN tinan oin nudar ona full member,” dehan Ministra Adaljiza Magno.

Serimonia ne’e remata ho show ida kona-ba diversidade kulturál ASEAN nian iha dapur oioin iha ASEAN nia laran ne’ebé prepara husi Embaixada Estadu Membru ASEAN sira iha Dili.

ASEAN harii iha Bangkoke, Thailandia iha 8 Agostu 1967 liuhusi asinatura Deklarasaun Istóriku Bangkok nian husi Ministru Estranjeiru sira husi Estadu-Membro Fundador lima, hanesan Indonezia, Malazia, Filipina, Singapura no Tailandia. Iha tinan barak nia laran, ninia membru sira-ne’e sai barak liu ona, inklui Brunei Darussalam, Vietnam, Laos PDR, Myanmar, no Kamboja.

Husi grupu ki’ik ida husi nasaun Sudeste Aziatiku sira, ASEAN evolve ona ba komunidade ida-ne’ebé bazeia ba regra sira ne’ebé hala’o papél xave ida iha promosaun pás no estabilidade rejionál, prosperidade no dezenvolvimentu, enkuadra iha pilár tolu husi Komunidade ASEAN: APSC, AEC, no ASC.

Tema ba ASEAN iha tinan 2022 ne’ebé lidera Kamboja mak “ASEAN A.C.T.: Responde ba Dezafiu sira Hamutuk,” ne’ebé subliña “importánsia husi espíritu ASEAN nian nu’udar família ida-ne’ebé unidu ba na’in sanulu, ho sentidu forte kona-ba tentativa atu responde ba dezafiu komún sira no atinje meta sira ne’ebé fahe ona.”

Hola prezensa seremonia ne´e embaixador sira hosi estadu membro ASEAN hanesan Brunei Darussalam, Indonezia, Malazia, Filipina, no Embaixada Thailand hamutuk organiza selebrasaun ba aniversáriu ba 55 Estabelesimentu Asosiasaun Nasaun Sudeste Aziatiku (ASEAN) iha Embaixada  Thailand iha Dili.