Komisaun G PN Halo Fiskalizasaun ba MJDAK

DILI, www.news-viptv.com – Komisaun G Parlamentu Nasional (PN) halo fiskalizasaun ba Ministeriu Juventude, Desportu, Arte no Kultura (MJDAK), Kinta (09/01/2025).

Fikalizasaun Komisaun G ne’ebe lidera husi Armando dos Santos Lopes nu’udar prezidenti komisaun hodi hare ezekusaun Orsamentu Jeral Estadu MJDAK nian no programa ho atividade sira ne’ebe halao iha nivel nasional no munisipiu.

“Enkontru ohin iha topiku 3 koalia, permeiru hatoo ba Ministru no Sekretariu Estadu preokupasaun hirak ne’ebe akontese iha 2024, husu dezafiu sira ne, estratejia prinsipal saida mak sira atu bele rezolve iha 2025 nian, no preparsaun jogos CPLP,” dehan Deputadu Armando, iha edifisiu MJDAK Lecidere, Dili.

Alende jogo CPLP ne’ebe sei realiza iha Timor-Leste, tinan 2025, Timor-Leste mos sei partisipa jogo SEA Games iha Thailandia.

Iha inkontru ne’e, Komisaun G husu mos esklaresementu husi ministru nu’udar membru governu ne’ebe responsavel ba area MJDAK kona ba derota ne’ebe selesaun futebol hetan iha jogos internasional sira.

Komisaun G PN ne’e simu dereta husi Nelyo Isaac nu’udar ministru no Jorge S. Cristovão nu’udar Sekretariu Estadu Arte no Kultura ho mos diretores jeral no assessor MJDAK sira.