KM Artomoro II Mout, UPM Salva Vitima 15, 1 Mate

DILI, www.news-viptv.com – Unidade Polisia Maritima (UPM) konsege salva Sidadaun Indonesia nain 15 ne’ebe sai vitima husi ro’o KM Artomoro II ne’ebe mout iha entre Tasi Liran no Atauro iha 2 Jullu 2024 oras tuku 11.45 kalan.

Iha asidenti ne’e, alende sidadaun Indonesia nain 15 maka salva, iha ida maka relata mate no nia mate isin hetan besik tasi Makili-Atauro ou metro 15 husi tasi ibun Makili.

Sidadun Indonesia nain 15 no mate isin ne’e rasik entrega ona ba parte Embaixada Indonesia (KBRI, red) ne’ebe simu dereta husi Embaixador Okto Dorinus Manik no akompana husi Sekretariu Estadu Protesaun Sivil (APC), Domingus Mariano Reis, Kinta (4/7/2024), iha Kuartel UPM Lecidere, Dili.

“Ita hatene katak relasaun Timor-Leste no Indonezia la’ós de’it relasaun polítika bilateral, maibé relasaun umanu no família. Tanba ne’e hau lori Governu Indonezia nian naran hakarak hato’o agradesementu ba governu Timor-Leste liu hosi Komandante UPM, ne’ebé halo intervensaun ida ho lalais tebes,” dehan Embaixador Okto.

Kona ba mate isin, depois halo autopsia, parte KBRI sei lori mate-isin entrega ba familia liu husi fronteira.

SEPS, Domingos Mariano Reis hateten, prosesu salvasaun ba vitima hahu husi ema nain 13 maka hetan salvasaun uluk, hafoin nain rua hetan depois, no ikus vitima mate ho naran Purwanto (idade 64) hetan iha Kinta (4/7/2024) tuku 3 madrugada.

“Momentu assidenti ne’e APC Munisipiu Atauro halo kedan kordenasaun ho UPM Atauro hodi halo salvasaun no hetan duni sidadaun nain 15, ida mate hetan depois, hafoin buka loron tomak,” hateten Domingos Reis.

Segundu Komandante Unidade Polísia Marítima (UPM), Inspetor Xefi Polisia, Aniceto da Silva Fátima, hateten hafoin simu informasaun kona ba ró KM kargo Artomoro II mout, nia fo ordem kedan ba nia membru hodi halo operasaun salvasaun nian.

“Ita simu informasaun iha loron 2 jullu katak ró KM kargo Artomoro II husi Surabaya atu ba Papua mai hetan insidente, entaun ita haruka kedas membru sira ba iha fatin refere. Seidauk too iha fatin ne’eba ita hetan ona ema sira ne’ebé salva aan mai ho boia salva vida konsege iha tasi laran entaun ita tula kedan sira mai asegura iha postu UPM Atauro atu nunee bele halo atendementu umanitaria ba sira,” esplika Komandante Aniceto.

Francisco de Araújo, komunidade ida ne’ebe hetan uluk mate isin epslika, nia hare mate isin ne’e iha tuku 4:47 madrugada, hafoin hetan, nia informa kedan ba autoridade local no UPM  hodi evakua kedan mate-isin ba tasi ibun.