Klinika Saude Matebian Hun Persiza Parteira

DILI, www.news-viptv.com – Relasiona ho preokupasaun komunidade sira ne’ebe hela iha Matebian Hun kona ba Klinika Saude ne’ebe laiha parteira, Deputadu CNRT, Anacleto Freitas, iha plenaria Parlamentu Nasional husu ba Ministeriu Saude atu tau parteira hodi tulun inan sira iha prosesu partus nian.

“Hau hakarak foti iha Munisipiu Viqueque assuntu saude nian, Iha klinika ne’ebe dook husi munisipiu no postu, hanesan Uaimoritula, Matebian Hun, Luarai Kuak, klinika iha pesoal saude iha ne’eba, soke parteira maka laiha. Tamba ne’e inan feto sira wainhira hakarak partus halai ba sentru munisipiu, do’ok tebes, kadavez ambulansia laiha. Ne’ebe ita ema sira iha ne’eba ejiji karik bele kompleta mos parteira iha ne’eba hodi ajuda ita nian inan sira,” dehan Anacleto Freitas, Segunda (17/2/2025).

Nune’e mos deputadu FRETILIN Antoninho Doutel Sarmento lamenta aimoruk injeksaun ne’ebe laiha iha ospital Same, Munisipiu Manufahi.

“Iha same ita laiha aimoruk injeksaun nian, foin samodok tata inan feto lori ba ospital, sira iha 8 Fevereiru simu reseitas husi dotor ba sosa aimoruk iha apotek para sona nia elevia moras sira ne’e. Servisu saida maka ne’e, dehan aimoruk barak hela, barak hela, depois dehan laiha,” nia hateten.

Deputadu Antoninho Bianco iha plenaria mos levanta kona ba ambulansia saude ne’ebe baku fila tamba rona kondutor ne’ebe lori kareta ho kondisaun lanu.

“Iha Bobonaro, diretor saude ba ambulansia la autoriza ambulansia atu tula ema moras, realidade hulan ema moras ne’e. Akontese iha Suku Sibuni,” dehan deputadu FRETILIN ne’e.

Relasiona ho video viral husi Suku Sibuni, Deputadu CNRT, Carminda Carlota hateten informasaun sira ne’ebe dehan ema hulan deit avo ida ne’ebe moras hakat mota ne’e los, maibe ambulansia hein kedan iha mota sorin tamba kondisaun mota bo’ot ambulansia labele tama.

“Senhor ida koalia hodi Maromak nia lian, hau koalia los no labosok, na realidade bosok lolos, husu informasaun lolos. Hau iha video kompletu iha ne’e, avo ne’e leva husi sibuni ba molop tamba estrada aat no mota boot, ambulansia husi bobonaro para iha mota ninin, no leva avo ne’e pasa ba ambulansia ne’ebe iha mota sorin hodi lori ba bobonaro,” nia dehan.

Tamba ne’e husu ba deputadu sira atu hasai informasaun karik tenki tuir faktus no labele politiza demais.

“Husu inofmrasaun lolos, la povu iha baze hamnasa. La gosta governu ne’e maka edit tun sai, informasaun ne’e bosok,” hateten Deputada Carminda.