Kazu Naok Sasan iha Fatuhada, PNTL Kontinua Buka Tuir Membru NAKRO nain 2

DILI, www.news-viptv.com – Polisia Nacional Timor-Leste (PNTL) kontinua buka tuir suspeitu naokten nain rua ne’ebe identifika husi grupu Naok-ten Kroniku (NAKRO) ne’ebe involve iha kazu naok sasan iha loza Xineza ida iha Fatuhada, Dili.

Diretor Diresaun Investigasaun Kriminal, Superintendente Polisia João  Belo dos Reis informa, kazu nauk sasan ne’e akontese iha 16 Junu 2025, ho suspeitu sira maka maka DMLABAM, DGJ, YGKS, EKADI, SF, DP, ASG, ADV, no suspeitu sira ne’e agora daudauk iha sela detensaun Polisia Eskudra Dili.

“Iha 16 de Junu 2025, akontese kazu naok ida sobu loja Xina iha area Fatuhada, depois de rona imformasaun ekipa konjuntu kompostu husi servisu imformasaun polisia nian, no servisu imformasaun husi Militar no nasional nian SNI, no halo kedas servisu rapidu, no halo tracking ba krimozu sira ne’ebe envolve,” dehan Superintendente Polisia João Belo ba jornalista sira iha konferensia imprensa, Kuarta (25/6/2025), iha Kuartel Jeral PNTL, Kaikoli, Dili.

Nia esklarese tan, iha kazu ne’e hafoin halo identifikasaun, Polisia Investigasaun Eskuadra Dom Aleixo aprezenta ba Ministerio Publiku.

“Orseik (24 Junu, red) ami hetan mandadu detensaun husi Tribunal Distritu Dili, i halo kedas operasaun imediata ba suspeitu sira, nune’e suspeitu nain-7 ita konsege detein no agora dadaun iha sela Polisia Dom Aleixo,” nia dehan.

Komandante ne’e esplika tan, suspeitu sira ne’e, suspeitu ne’ebe sai tama komarka halo asaun krime beibeik, no baihnira hetan libertasaun husi tribunal sira kontinua komete nafatin krimi.

“Suspeitu ne’e rasik bolu sira nia an dehan NAKRO, Naok-ten Kroniku, tan ne’e suspeitu sira dala-ida tan, rua mak ita sei halo tracking nafatin, maibe PNTL, ho ninia parseiru sira sei la fo oportunidade ba naok ten sira hanesan ne’e atu ezizi iha ita nia rai laran, tamba ami tenki garanti hamutuk ho komunidade, ho ami nia  parseiru sira atu garante  nasaun  ida ne’ebe  seguru ba ita nia komunidade sira,” dehan komandante ne’e.

Suspeitu nain 8 ne’ebe servisu koordenada hodi naok maka hanesan AV alias Tinu fender, nudar xefi ekipa NAKRO, ADSG alias Antonio gang 45, DP alias Mizio/Kozi, IG alias Kaka, Fiki Soares alais Afiki Gang 45, FSD alias Riki Tohar, JF alias Jose pelatih no-mos EV alias Viana ho evidensia telefone ne’ebe maka ekipa rekolla husi suspeitu sira hamutuk 13 ho marka Iphone 6, Samsung 6, Awesone 1.

Iha prosesu identifikasaun suspeitu sira koopera di’ak hodi deklara entre suspeitu sira ne’e sei falta suspeitu nain rua ho naran Aldo nudar Xefi Grupu Naok ho naran TATA ho nia membru naran Ramadhan maka seidauk asegura tanba sira nain 2 lori evidensi telefone 36 ho laptop 1 halai ses ona hosi nia rezidensia iha Dili ba fatin seluk tanba sira nia rede iha mos Munisipiu seluk.

Ekipa servisu ne’ebe dirije husi Xefi Departamentu Informasaun no Kontra Informasaun hamutuk ho Makikit 1, dezenvolve kazu ne’e konsege identifika suspeitu balu sei iha tan, nune’e ekipa sei kontinua halo vizilansia hodi buka tuir. Enkuantu Komandu Operasaun mos haforsa vizilansia no hasai ona ordem ba membru sekreta sira hodi buka tuir suspeitu sira nia paradeiru tanba sira nia rede estabelese ona iha Munisipiu.

Hafoin remata prosesu identifikasaun ekipa servisu halo kedas auto entrega suspeitu sira hamutuk ho evidensia motor ne’ebe uza hodi naok ba Servisu Investigasaun Kriminál Dom-Aleixo, hodi halo prosesu investigasaun klean.