Japaun Apoiu Milaun US$ 5.9 Harii Edifisiu Foun RTTL

DILI, www.news-viptv.com – Governu Japaun komitmentu ona ho nia orsamentu hamutuk miliaun US$ 5.9 hodi apoia harii edifisiu foun Radio Televisaun Timor-Leste (RTTL, EP).

Iha nia hasoru malu ho Sekretaria Estadu Komunikasaun Sosial (SEKomS), Expedito Dias Ximenes, Embaixador Japaun mai Timor-Leste, Tetsuya Kimura espera kontrusaun ba edifisiu foun bele lao susesu no kompletu.

“Preparasaun ba konstrusaun lao diak,  no agora kompana ne’ebe simu ona kontratu agora hahu ho desena edifisiu nian, hau espera projetu bele lao susesu ho kompletu,” informa Tetsuya Kimura ba jornalista sira, Tersa (23/1/2024), iha Palacio do Governo, Dili.

Embaixador ne’e esplika, orsamentu ne’ebe harii edifisiu RTTL, Ep ne’e inklui kompaun ba sentru treinamentu nian.

“Japan apoia ona demokrasia iha Timor-Leste, hahu iha prosesu eleisaun, agora liberdade imprensa mos importante, tan nee maka ami apoia RTTL, no espera bele iha servisu hamutuk ne’ebe diak,” nia dehan.

Kontrusaun edifisiu foun RTTL, Ep ne’e, esplika Expedito Dias Ximenes sei lao durante tinan rua hahu 2024 to’o 2026.

“Ohin Embaixador Japaun mai halo enkontru ha’u no mos Prezidente RTTL Ep iha SEKomS hodi fo hatene kona-na preparasaun kontrusaun edifisiu sentral RTTL nian iha Kaikoli. Hanesan ita hotu hatene katak Governu Japaun apoiu liuhusi nia ajuda US$ 5.9 milaun mai iha Governu Timor-Leste hodi fo apoiu ba konstrusaun edefisiu sentral ba RTTL ne’ebe sei hahu iha tinan 2024 no sei remata iha tinan 2026,” dehan Expedito Dias Ximenes.

Governante ne’e no mos salienta katak orsamentu ne’ebe Governu Japaun aloka ne’e iha osan balun sei uza mos ba formasaun espesial ba Jornalista RTTL sira ho karakteristika investigativu.