Iha Covalima, PNTL Bandu Ema Uza Atributu GAM ba Semeteriu iha Loron Finadu

DILI, www.news-viptv.com – Atu evita problema ne´ebe sempre akontese iha semeteriu publiku sira durante selebrasaun finadu nian, durante loron refere Komando Polisia Nasional Timor-Leste (PNTL) Munisipiu Covalima hasai ona karta avizu bandu ema sira ba semeteriu uza atributu Grupu Arte Marsiais (GAM).

Karta avizu ne´ebe asina iha data 29 Outubru 2022 hosi Komandante PNTL Munisipiu Covalima, Superintendente Polisia Basilio de Jesus, L.CG, ne´e espalla ona iha publiku liu hosi media sosial sira.

Avizu bandu uza atributu GAM ne´e hakerek iha pontu numeru 4 “La autoriza uza atributu GAM (Arte Marciais) hodi halo movimentu ba iha fatin cemeterio”.

Iha pontu ba dalima nian, razaun bandu ema uza atributu GAM iha semeteriu ne´e hanesan mos ho pontu dahuluk to ´o datoluk maka atu evita problema no konflitus ne´ebe bele kria disturbusaun ordem publika.

Pontu dahuluk nian avizu ne´e aviza, hahu iha 30 Outubru to´o 3 Novembru hato´o ba jovem mane no feto sira hotu la autoriza hemu tua no loke karaoke hodi dansa iha fatin semeteriu/santa cruz.

“Uza transporte kareta ou motor tenki iha dokumentos no mos ba motorista sira tula ema labele liu hosi em anain 2 / uza kapasete (hodi salva vida),” hakerek avizu ne´e iha pontu daruak.

Ba pontu datoluk, aviza mos ba komunidade wainhira ba semeteriu atu la lori sasan kroat hanesan katana, tudik, rama no sel-seluk tan.

Iha Timor-Leste, GAM 3 ne´ebe ho nia membru barak maka hanesan PSHT, IKS-PTL no KORK. Alende mos iha arte marsiais seluk hanesan Padjajaran, Perisai Diri, Merpati Putih, Seruling Dawata, Rajawali no seluk tan.

Timor-Leste iha 1-2 Novembru sempre selebra loron finadu hodi hanoin hikas sira nia matebian sira tuir tradisaun Katolika nian iha mundu.