HWPL no VIP TV Halo Mural Painting Hodi Promove Pas liu Media

DILI, www.news-viptv.com – Organizasaun Internasional ba Pas hosi Koreia Sul, HWPL no grupu foin-sa’e IPYG, iha kolaborasaun ho VIP TV, media online Timor-Leste nian, hala’o atividade  mural painting (pinta diding lolon) iha Bairo Kakaulidun, Suku Bairo Pite, Postu Administrativu Dom Aleixo, Munisipiu Dili.

Mural painting ne’ebe HWPL halo ho kolaborasaun VIP TV, nu’udar atividade daruak hafoin implementa iha diding lolon Xanana Sport Center iha Bairo Grillos.

Atividade mural painting ne’ebe halao iha Kakaulidun involve mos grupu artes husi Artes Moris, Sene Art no juventude voluntariu sira desde Fevereiru no remata iha Outubru 2024.

HWPL no IPYG, hamutuk ho governu Timor-Leste no komunidade lokál sira, haka’as an atu promove rekuperasaun sosiál, unidade no dezenvolvimentu liuhusi habelar kultura dame nian.

Maske nune’e, durante prosesu implementasaun Painting Mural da-ruak nian, mosu dezintendementu ho bairo nain ne’ebe hanoin atividade ne’e iha finansiamentu husi HWPL tamba nu’udar organizasaun internasionál ida, ikus FONGTIL konsege esplika ba autoridade local katak atividade refere halo ho voluntariamente no pinta ne’ebe uza hetan apoia husi kompana Vinod Patel.

Maski mosu miss komunikasaun, HWPL ho VIP TV nia pasiénsia no esforsu kontinua ba dame fó dalan ba Dili atu halo pasu daruak hodi sai sidade dame nian.

Iha atividade rua ne’e, ho tema “Pas Media,” mural esplika oinsá Dili, Timor-Leste, transforma hela ba sidade dame nian liuhusi lian HWPL no média nian. Mural painting ne’e mos iha ligasaun ho orgaun komunikasaun social hanesan Konsellu Imprensa (KI), VIP TV, MDT, TLPC (Timor-Leste Press Council), Tatoli, Timor-Post, G-News, Dili Post, Jornal Independente, STL News no Lafaek News, ne’ebé asina ona MOU ho HWPL atu habelar notísia dame iha mundu tomak.

Mural ajuda sidadaun barak atu komprende no rekoñese importánsia husi meiu komunikasaun sosiál dame nian, atividade dame nian, no valór dame nian. Aleinde ne’e, foin-sa’e sira ne’ebé partisipa iha mural rekoñese katak liuhusi kooperasaun no voluntáriu, sira bele fó impaktu pozitivu ba komunidade lokál sira, no sira hetan inspirasaun atu envolve liután iha atividade pás nian iha futuru.

Nu’udar nain VIP TV, Evangelisto Gantry dos Santos Eilana, ne’ebé halo inisiativa iha atividade sira iha Pas Mural, hatete: “La iha dame, susar tebes atu moris hamutuk, no la iha hamutuk, susar tebes ba ita atu hala’o atividade sira, inklui dezenvolvimentu. Mundu ne’e sei furak liu se iha dame iha fatin hotu. VIP TV kontente tebes no orgullu tebes hodi hala’o atividade ne’e hamutuk ho HWPL no foin-sa’e sira atu promove pás iha Timor-Leste.”

HWPL no IPYG sei kontinua diskute dalan sira atu promove dezenvolvimentu no estabelese pás iha Timor-Leste, hala’o atividade pás hanesan pinta mural, operasaun Gabinete WARP, no edukasaun pás hodi realiza pás ba nafatin.