Hasoru PM Xanana, Steve: Sedu Liu hanoin Dada Kadoras Mai Timor-Leste 

DILI, www.news-viptv.com – Reprezentante Espesial Greater Sunrise Australia, Steve Barcks hateten nia parte labele resposta kedan ba hanoin Timor-Leste ne’ebe hakarak dada kadoras mai Timor-Leste tamba sedu liu.

“Atu dada kadoras mai Timor hau hanoin sedu liu atu koalia, maibe ami diskute buat barak, no sei iha update iha tempu badak,” informa Steve ba jornalista sira hafoin hasoru malu ho Primeiru Ministru (PM), Xanana Gusmão iha Palacio do Governo, Dili, Segunda (11/12/2023).

Tuir reprezentante Australian nian ne’e, persiza halo estudu viabilidade foun ba konseitu dezenvolvimentu Greater Sunrise no ba estudu ne’e, Governu Timor-Leste no Governu Austrália konkorda malu ona.

“Australia iha komitmentu no kompromisiu hodi lori projetu Greater Sunrise ne’e ba oin tenke hare mos ba viabilidade no ekonomia maibe esperansa bo’ot iha tinan oin iha ona dezisaun ba projetu ne’e,” hateten Steve Bracks.

Iha estudu viabilidade foun ne’e, kompania join venture sira mos sei hare kona ba ekonomiku viavel ne’ebe maka diak liu bainhira atu dezenvolve iha Timor ka Darwin, ne’ebe iha Junu 2024 iha ona rezultadu.

“Ami deskute buat barak Maibe iha tempu badak mak imi sei rona resultadu iha tinan oin no mos Australia sei kontinua estudu foun entaun iha estudo nee hare liu ba maneira ekonomia ne’ebe diak liu atu dezemvolve iha Timor no mos iha Darwin tamba agora dadaun ne’e iha mudansa barak iha Australia liu liu iha Darwin entaun ami estuda oinsa atu hare sistema ne’ebe bele uza,” nia dehan.

Inkontru ne’e mos hetan akompanamentu hosi Ministru Petróleo no Rekursu Minerais, Francisco da Costa Monteiro. Antes ne’e, Ministru Petróleu no Rekursus Minerais, Francisco da Costa Monteiro, hasoru malu ho CEO Woodside Meg O’Neil ho nia ekipa hodi deskuti kona-ba dezenvolvimentu Greater Sunrise.

Kompaña Petrolífera Woodside no Timor-Leste konkorda atu servisu hamutuk no fiar malu, tanba governu Timor-Leste aprova ona estudu ba selesaun konseitu ba projetu ne’e.

TIMOR GAP no Autoridade Nasional Petróleu (ANP) no Kompaña Joint Venture mós hala’o ona enkontru intensivu hodi finaliza dokumentu ne’ebé aprovadu no analiza mós Kódigu Mineiru ba Petróleu, Rejime Taxa no Kontratu ba Partilla Produsaun.

Estadu Timor-Leste liuhosi Timor GAP, E.P hola parte ona iha konsórsiu Greater Sunrise, ho partisipasaun maioria reprezenta 56,56%, Woodside (operadora) 33,44% no Osaka Gas 10%.