banner 1000x250

Hases hosi “Planu Demisaun”, Francisco Jeronimo Rezigna hosi Kargu Prezidenti FFTL

  • Share
eis Prezidenti FFTL, Francisco Jeronimo koalia ba jornalista hafoin hatoo nia rezignasaun. Foto: VIP TV / Nuryanti Fatima
banner 728x90

Dili, www.news-viptv.com – Atu hases an hosi “planu demisaun” ne’ebe planeiadu ona hosi maioria membru assosiasaun sira,  Prezidenti Federasaun Futebol de Timor-Leste (FFTL), Francisco Jeronimo ikus offisialmente desidi rezigna hosi nia kargu.

Rezignasaun ne’e Francisco Jeronimo hato’o iha kongressu extra-ordinariu FFTL ne’ebe realiza iha Hotel Timor, Sexta (10/11/2023).

Francisco Jeronimo deklara nia rezignasaun hosi kargu Prezidenti FFTL iha kongresu extra-ordinariu FFTL. Foto: VIP TV / Nuryanti Fatima

“Ohin ha’u tenke hateten ba ita-boot sira katak, ita-boot sira nia hakarak ha’u tenke kumpre. Tamba ne’e, ha’u hanesan ema, ha’u husu deskulpa no perdaun ba ita-boot sira hotu, karik tamba iha ha’u nia servisu tamba lad’iak halo ita-boot sira hirus no halo ita oin buis ba malu. Ohin dunik, ha’u deklara katak ha’u Francisco Martins da Costa Pereira Jerónimo hanesan Prezidente FFTL ofisiálmente rezigna hosi ha’u nia kargu,” deklara Francisco Jeronimo ba kongresista sira.

Ho rezignasaun ne’e, Francisco Jeronimo entrega ba membru assosiasaun sira atu hili fali lideransa FFTL foun tuir sira nia kriteriu.

Maski deside rezigna ona hosi nia kargu, nia kontinua promesa pronto atu kontribui ba dezemvolvimentu futebol ho lideransa foun FFTL hodi dezemvolve futebol iha rai ne’e.

“Hau prontu nafatin atu fo apoio ba se-se deit,” nia dehan hodi espera iha estrutura foun mai sei halao servisu ho diak no garante katak iha futuru sei la iha tan failansu.

Reprezenta Asosiasaun Munisipiu Aileu, Eurogio Sarmento esplika katak, karik Francisco Jeronimo maka la rezigna hosi nia kargu, sei iha demisaun ba nia tamba assosiasaun sira lakon ona konfiansa.

“Sei ohin maka nia la rezigna-an, entaun sei iha demisaun ba nia,” deklara Eurogio.

Ho rezignasaun lideransa numeru ida iha FFTL, Prezidenti Assosiasaun Munisipiu Ermera, Lomelino da Silva husu nafatin atu atividade futebol ne’ebe lao hela labele para no espera prezidenti foun bele lori dezemvolvimentu futebol diak liu tan.

“Lideransa ida ne’ebe mai tenki ho fuan diak hodi dezemvolve, no bele lori futebol diak liu tan iha future,” dehan Lomelino.

FFTL iha hamutuk assosiasaun 21 maka assosiasaun hosi munisipiu 14, Assosiasaun Futebol Feto, Assosiasaun Arbitrazem, Assosiasaun Futebol Salaun, Assosiasaun Treinador, Assosiasaun Futebol Juvenil, no klubu rua hosi primeira divisaun no segunda divisaun.

  • Share

Leave a Reply

Your email address will not be published. Required fields are marked *

error: Content is protected !!