Governu-UNFPA Inaugura Sentru KEMON-B iha Gleno

GLENO, www.news-viptv.com – Governu hamutuk ho UNFPA no Embaixada Australia iha Timor-leste lansa Fasilidade Kuidadus Obstetriku no Neonatal Baziku iha Maternidade Gleno, Munisipiu Ermera, Tersa (23/4/2024).

Ho sentru KEMON iha Gleno, hamutuk iha ona Sentru KEMON 5 ne’ebe antes ne’e harii ona iha Liquisa, Viqueque, Same no Atauro iha tina kotuk liu ba.

Sentru KEMON ne’ebe estabelese sai hanesan sentru ho fasilidade no kompetensia atu fornese servisu KEMON ho kualidade aas husi pesoal saude sira ne’ebé treinadu, iha komprimisu no kompaixaun atu servi inan ho sira-nia kosok-oan sira.

Vise Primeiru Ministru no Ministru Koordenador Assuntu Sosial, Ministru Desenvolvientu Rural no Habitasaun Komunitaria, Maria Assanami Sabino agredese ba UNFPA liu hosi Fundus Governu Australia ne’ebe harii ona fasilidade ba Kuidadu Obstetriku no Neonatal Baziku.

Prezidenti Autoridade Munisipiu Ermera, José Martins dos Santos hateten, ho Sentru KEMON ne’ebe estabelese sei hakbesik liu tan inan isin rua ho bebe sira ba fasilidade saude.

Reprezentante UNFPA iha Timor-Leste, Bruce Campbell informa, UNFPA ho Fundus Governu Australia sei estabelese tan Sentru KEMON 22 tuir planu ne’ebe trasa ona.

Nune’e mos Embaixadora Austrália iha Timor Leste, Caitlin Wilson hateten, Governu Australia iha komprimisu bo’ot hodi apoia Timor-Leste iha setor oin-oin, inklui hasa’e kualidade ba kuidade saude primaria.

Sentru KemON-B dalima ida ne’e, inklui treinamentu EmONC ba mediku no parteira sira hodi hasa’e sira-nia kapasidade no kompetensia iha area kuidadu emerjensia obstetriku no ba bebe foin-maris sira, hadia infra-estrutura fasilidade maternidade, no fornesimentu ekipamentu médikus, mobiliarius no nesesidade eskritóriu nian hodi apoiu pesoal saude sira-nia servisu iha atendimentu inan no bebé-oan sira.