Dili, wwwnews-viptv.com , 23 Outubru 2026 — Sekretáriu-Jerál no Prezidente Interinu FRETILIN, Dr. Mari Alkatiri, simu delegasaun Uniáun Europeia (UE) iha CCF Fatuhada, Dili, atu diskute kona-ba preparasaun ba eleisaun prezidensiál 2027, inklui possibilidade haruka misaun observasaun eleitorál ba Timor-Leste. Iha enkontru ne’e, FRETILIN manifesta preokupasaun kona-ba transparénsia finansiamentu kampaña, implementasaun rekomendasaun observasaun eleitorál iha eleisaun sira uluk no integridade prosesu eleitorál, hodi hametin responsabilidade no konfiansa públika ba instituisaun demokrátika iha nasaun.
Diskusaun ne’e foka ba misaun esploratória ne’ebé Uniáun Europeia bele hala’o atu avalia possibilidade haruka ekipa observasaun eleitorál ba eleisaun prezidensiál ne’ebé sei realiza iha tinan 2027.
Iha enkontru ne’e, FRETILIN fó atensaun ba implementasaun rekomendasaun sira husi Misaun Observasaun Eleitorál Uniáun Europeia iha eleisaun sira antes, liuliu kona-ba finansiamentu kampaña no transparénsia eleitorál.
Asuntu seluk ne’ebé mós hetan diskusaun mak independénsia judisiária, korrupsaun no kontestu polítiku iha Timor-Leste. Tema sira ne’e konsidera importante iha esforsu atu hametin demokrasía, responsabilidade no fiar públika ba instituisaun estadu sira.
FRETILIN reafirma katak integridade prosesu eleitorál sai prioridade, tanba prosesu eleitorál ne’ebé transparente no kredível importante tebes atu garante respeitu ba vontade povu no hametin demokrasia iha Timor-Leste.
Além ne’e, FRETILIN husu ba Uniáun Europeia atu konsidera haruka Misaun Observasaun Eleitorál ba Eleisaun Parlamentár 2028. Husu ne’e iha objetivu atu apoia transparénsia, responsabilidade no konfiansa sidadaun sira ba prosesu eleitorál no instituisaun demokrátika.
Delegasaun Uniáun Europeia lidera husi Sr. Andrea Rossi, ofisiál polítika ba demokrasía no observasaun eleitorál husi European External Action Service (EEAS), hamutuk ho Sr. Christoph Sorg, Vice-Ambassador husi Delegasaun Uniáun Europeia ba Timor-Leste.
Delegasaun ne’e mós inklui reprezentante no konsultór sira ne’ebé servisu iha área polítika externa, instrumentu Komisaun Europeia, eleisaun, direitu, lojístika no seguransa, atu partisipa iha diskusaun kona-ba kondisaun no preparasaun ba observasaun eleitorál.
Iha parte FRETILIN, Dr. Mari Alkatiri akompaña husi Adjunto Sekretáriu-Jerál, Camarada José Reis no Camarada Flávio da Silva, hamutuk ho membru Komité Sentral FRETILIN Miguel Pereira de Carvalho no Edio José Maria Guterres.
Enkontru ne’e sai oportunidade ida ba FRETILIN no Uniáun Europeia atu troka hanoin kona-ba dezafiu no prioridade sira iha prosesu eleitorál Timor-Leste, liuliu iha preparasaun ba eleisaun prezidensiál 2027 no eleisaun parlamentár 2028.
Transparénsia finansiamentu kampaña, implementasaun rekomendasaun observasaun eleitorál no respeitu ba prinsipiu demokrátiku kontinua sai asuntu importante atu garante integridade prosesu eleitorál no hametin konfiansa públika iha Timor-Leste.
