Forma Governu Koligasaun, CNRT-PD Aseita Xanana Gusmao ba PM

DILI, www.news-viptv.com – Hafoin Tribunal Rekursu anunsia offisialmente rezultadu Eleisaun Parlamentar 21 Maiu nian, Partidu Congresso Nacional da Reconstrução de Timor Leste (CNRT) ne´ebe sai vensedor ho kadeira 31 hamutuk ho Partidu Democratico (PD) ne´ebe hetan kadeira 6 aseita ona hili Kay Rala Xanana Gusmão ba Primeiru Ministru ba IX Governu Konstitusional.

“Laiha tawar buat seluk, Primeiru Minitru maka Maun Bo´ot Kay Rala Xanana Gusmão,” deklara Francisco Kalbuadi, Segunda (5/6/2023) iha Sede Nasiona Partidu Democratico, Kolmera, Dili.

Iha formasaun IX Governu Konstitusional, Francisco Kalbuadi Lay afirma, Prezidente Partidu CNRT, Xanana Gusmão liu hosi karta offisial ne´ebe nia lori deretamente afirma ona CNRT prontu forma governu hamutuk PD.

“Ohin ami mai iha ne´e atu reafirma ho karta ne´ebe iha 30 Maiu ne´ebe lori hosi Sekretariu Jeral PD, partidu rua ne´ebe hetan fiar hosi povu, ohin lokoraik ami reafirma partidu CNRT prontu halo koligasaaun ho PD,” dehan Francisco Kalbuadi.

Nia mos esklarese, CNRT ho PD laos koligasaun foun ne´ebe foin lao forma governu tamba iha ona esperensia hamutuk hodi lidera governu anterior.

“Partidu rua ne´e laos foin servisu hamutuk, desde 2007, PD maka CNRT, CNRT maka PD,” nia dehan.

Iha nia deklarasaun ne´e, Partidu CNRT kongratula mos ba partidu plataforma (FRETILIN, PLP ho KHUNTO) no partidu 12 seluk ne´ebe la hetan asentu ne´ebe kontribui ona ba eleisaun ne´ebe diak, hakmatek no dame.

“Eleisaun lao diak hakmatek no dame, kongratula ba povu Timor tomak liliu ba militante no simpatizante partidu rua ne´e hotu,” dehan sekretariu jeral partidu CNRT ne´e.   

Ho karta resposta ne´ebe Maun Bo´ot Xanana Gusmão fo ona ba PD, lori estrutura PD, Sekretariu Jeral PD Antonio da Conceição Kalohan hato´o agradese ba CNRT ne´ebe aseita ona hamutuk ho PD hodi forma governu.

“Ohin ami hamutuk ho estrutura simu ona karta offisial, hato´o agradese no prontidaun atu simu ami nia dezesu ne´ebe hatoo iha 30 Maiu. Ohin halo

troka nota korespondensia ba aktu politiku. Agradese ba CNRT e nome PD lori Prezidente Assanami nia naran ne´ebe (CNRT) hatan ona karta ne´ebe PD haruka ba CNRT,” dehan Kalohan.

Iha Eleisaun Parlamentar 21 Maiu 2023, CNRT sai vensedor ho kadeira 31, FRETILIN, 19, PD 6, KHUNTO 5 no PLP 4.

Tuir Prezidenti Republika Jose Ramos Horta ne´ebe hatoo ona liu hosi media, xefi estadu hakarak Primeiru Ministru ho nia membru governu sira simu posse iha 18 Junu 2023.