FEKATIL Realiza Kampionatu Nasional Karate Xanana Cup 2024

DILI, www.news-viptv.com – Federasaun Karate-Do Timor-Leste hafoin tinan hat la halo kompetisaun nasional, Sabadu (15/6/2024), realiza kompetisaun nasional karate-do ho naran Xanana Cup 2024.

Ho realizasaun kampionatu nasional ne’e, Federasaun karate-Do Timor-Leste hato’o agradesementu ba Nono Governu Konstitusional tamba bele apoia ba kompetisaun refere.

Kompetisaun nasional ne’e, esplika Ministru Juventude, Desportu Arte no Kultura, Nelyo Isaac Sarmento laos deit sai kompetisaun ba atleta sira hodi hetan prestasaun, maibe sai mos prova ida ba treinador ba sira nia rezultadu ne’ebe hanorin ba atleta sira.

Iha fatin hanesan Embaixador Japaun iha Timor-Leste, Tetsuya Kimura senti orgullu ba Timoroan sira ne’ebe aprende karate nu’udar arte-marsial Japaun nian ne’ebe ho nia objetivu laos deit haforsa fiziku, haforsa mental no oinsa halao moris ne’ebe diak liu husi respeita ema seluk no halo tuir regulamentu sira ne’ebe iha.

Entertantu , Prezidenti Konfederasaun Desportu Timor-Leste, Macario Sanches espera liu husi kampionatu nasional ne’e, bele mosu tan atleta-atleta foun ne’ebe bele lori prestasaun ba Timor-Leste.

Total hamutuk orsamentu US$ 17,500 ne’ebe Ministeriu Juventude, Desportu, Arte no Kultura apoia ba kompetisaun nasional ne’e ho partisipasaun atleta hamutuk 130 husi munisipiu hotu.