Eviksaun Komunidade Mota Comoro ho Bebonuk, Governu Prolongan Tempu Loron 30 Hamamuk Fatin

DILI, www.news-viptv.com – Maski komunidade sira iha area mota ninin Comoro to’o tasi ibun Bebonuk lamenta ho planu eviksaun governu nian ba sira nia hela fatin, ekipa task force MOSS ne’ebe lidera hosi Sekretaria Estadu assuntus Toponimia no Organizasaun Urbanu kontinua fo deit tempu loron 30 hodi komunidade sobu rasik sira nia uma ou governu maka sobu.

Iha dialogu ne’ebe Sekretariu Estadu assuntus Toponimia no Organizasaun Urbanu, Germano Dias halo ho komunidade sira ne’ebe hela iha area mota Comoro Fomento Dois ho Tasi Ibun Bebonuk, governu tolera tan prolonga tempu ba notifikasaun daruak, no sei la tolera wainhira tempu notifikasaun ne’e remata.

Sebastiao Enatilo hateten eviksaun ne’ebe governu halo ba sira nia area laiha planu no deskonfia governu atu fo fali ba ema estranjeiru hodi halo fali atividade seluk.

Nune’e mos Domingas dos Reis nu’udar komunidade hateten nia prontu sai hosi sira nia hela fatin hodi apoia governu nia programa, maibe tenki selu fali uma ne’ebe sira harii.